Jer qoınaýyn paıdalanýshylarǵa aıyppuldy shetel valıýtasymen esepteý múmkin be – Bektenov jaýaby
ASTANA. KAZINFORM – Premer-mınıstr Oljas Bektenov Májilis depýtattarynyń jer qoınaýyn paıdalanýshylarǵa aıyppuldardy olar tabys tabatyn valıýtada esepteýge mindetteýge qatysty saýalyna jaýap berdi.
– Qazaqstan aýmaǵyndaǵy ekologııalyq quqyq buzýshylyqtar máseleleri tek ulttyq zańnama aıasynda ǵana qaralady. Ekologııalyq talaptardy buzǵany úshin ákimshilik aıyppuldar Ekologııalyq kodekske jáne Ákimshilik quqyq buzýshylyq týraly kodekske sáıkes ulttyq valıýtada salynady. Osyǵan baılanysty atalǵan aıyppuldardy shetel valıýtasyna teńestirý, sondaı-aq osydan týyndaıtyn valıýtalyq mándegi «shyǵyndar» týraly tujyrymdar mundaı óndirip alýlardyń quqyqtyq tabıǵatyna sáıkes kelmeıdi jáne quqyq qoldaný tájirıbesinde qoldanylmaıdy, - dedi Úkimet basshysy jaýabynda.
Premer-mınıstrdiń aıtýynsha, 2022 jyly Atyraý oblystyq ekologııa departamenti Soltústik Kaspıı jobasynda tekserý júrgizip, onyń barysynda ekologııalyq zańnamanyń buzýshylyqtary anyqtaldy. Bul rette birqatar buzýshylyqtar boıynsha sot talqylaýlarynyń qorytyndysy boıynsha aıyppuldar tólendi.
– Sot protsesteri barysynda Astana qalasynyń ákimshilik ister jónindegi sot alqasy 2025 jylǵy 1 tamyzda «Nort Kaspıan Opereıtıng Kompanı N.V.» kompanııasynyń talap aryzy boıynsha qaýly qabyldap, departamenttiń nusqamasyn rásimdik negizder boıynsha zańsyz dep tanydy. Keıinnen departament atalǵan rásimdik buzýshylyqtardy joıyp, NKOK ókilderiniń qatysýymen qaıta tyńdaý ótkizdi jáne tıisti qujattardy belgilengen tártippen resimdedi. Tekserý nátıjeleri sotpen kúshin joımaǵandyqtan, buryn toqtatylǵan ákimshilik ister boıynsha tıisti ákimshilik jazalardy qoldaný týraly sheshimder qabyldandy, - dedi Oljas Bektenov.
Aıta keteıik, Májilis depýtaty Qazbek Isa Úkimet basshysyna saýal joldap, onda qoldanystaǵy zańnamaǵa sáıkes, jer qoınaýyn paıdalanýshy – eksporttaýshylarǵa arnalǵan iri aıyppuldardy olardyń tabys tabatyn valıýtada esepteýdi mindetteýdi usynǵan edi.
Buǵan deıin Atyraý óńirindegi negizgi lastaýshy kásiporyndardyń biri «North Caspian Operating Company N.V.» (NCOC) kompanııasynyń «Bolashaq» zaýyty men suıyq tehnologııalyq qaldyqtardy ornalastyrý polıgony (STQOP) ekenin jazǵan edik.