Jer qoınaýyn paıdalanýshylardyń jaýapkershiligi zańmen kúsheıtiledi
ASTANA. KAZINFORM — Qazaqstanda jer qoınaýyn paıdalanýshylardyń taýarlardy, jumystar men qyzmetterdi satyp alý kezindegi ishki eldik qundylyq úlesin arttyrý talaptaryn saqtamaǵany úshin jaýapkershiligi kúsheıtiledi.
Bul týraly Ónerkásip jáne qurylys vıtse-mınıstri Oljas Saparbekov 2026 jylǵy 20 sáýirde ótken Májilis otyrysynda málimdedi.
Vıtse-mınıstrdiń aıtýynsha, «Ónerkásiptik saıasat týraly» zańǵa engizilgen ózgerister aıasynda iri tapsyrys berýshiler, sonyń ishinde jer qoınaýyn paıdalanýshylar qazaqstandyq qamtý úlesin arttyrý boıynsha arnaıy baǵdarlamalar ázirlep, ony iske asyrýǵa mindetti.
Bul qujattar otandyq taýarlar men qyzmetterdiń úlesi boıynsha nysanaly kórsetkishterdi belgileýdi, jergilikti óndirýshilermen kooperatsııany damytýdy jáne uzaq merzimdi kelisimsharttar jasasýdy qarastyrady.
Atalǵan sharalar turaqty óndiristerdi damytýǵa, otandyq kásiporyndardy qoldaýǵa jáne ulttyq ekonomıkany yntalandyrýǵa baǵyttalǵan. Sonymen qatar, qazirgi ýaqytta bul mindettemelerdi oryndamaǵany úshin jaýapkershilikti engizýdi kózdeıtin zańnamalyq túzetýler pysyqtalyp jatyr.
Usynylyp otyrǵan normalarǵa sáıkes, baǵdarlamalardy bekitý talaptaryn oryndamaǵany úshin birinshi jyly satyp alýdyń jalpy kóleminiń 1% mólsherinde, al kelesi jyldary 3% mólsherinde aıyppul salynady.
Budan bólek, baǵdarlamalardy iske asyrmaǵany úshin oryndalmaǵan mindettemeler (taýarlar, jumystar, qyzmetter jáne ofteık-kelisimsharttar) kóleminiń 30% mólsherinde aıyppul qarastyrylǵan. Osyndaı shara uzaq merzimdi sharttardy jasasý tártibin buzǵany úshin de qoldanylatyn bolady.
Aıta keteıik, jer qoınaýyn zertteý sapasy jańa tártippen baqylanatynyn habarlaǵan edik.
