Jer qoınaýyn paıdalanýshylar otandyq óndirýshilermen uzaq merzimdi sharttar jasasty
ASTANA. KAZINFORM — Qazaqstannyń jer qoınaýyn paıdalanýshylar otandyq óndirýshilermen 22 mlrd teńgege uzaq merzimdi sharttar jasasty. Bul týraly QR Energetıka mınıstrligi málim etti.
Mınıstrlik byltyrǵy jyldyń ekinshi jartyjyldyǵynan bastap jer qoınaýyn paıdalanýshylardyń qazaqstandyq taýar óndirýshilermen uzaq merzimdi sharttardy mindetti túrde jasasýyn qamtamasyz etý boıynsha jumys bastady.
Úsh iri operatordan jáne «QazMunaıGaz» UK» AQ kompanııalar tobynan bólek, jylyna 100 mln teńgeden astam somaǵa taýar satyp alatyn 60 jer qoınaýyn paıdalanýshy irikteldi.
Atalǵan jer qoınaýyn paıdalanýshylardyń taýar satyp alýlaryna taldaý júrgizildi. Qazaqstandyq taýar óndirýshilerdiń úlesin arttyrý jáne uzaq merzimdi sharttar jasasý áleýetin túsindirý, sondaı-aq taýarlardy, jumystar men kórsetiletin qyzmetterdi satyp alý tártibindegi qazaqstandyq óndirýshilerge basymdyq berý talaptaryn jetkizý boıynsha olardyń barlyǵymen kezdesýler ótkizildi.
— Júrgizilgen jumystardyń qorytyndysy boıynsha búgingi kúni jer qoınaýyn paıdalanýshylar tarapynan uzaq merzimdi sharttarǵa jalpy somasy 36,5 mlrd teńgege shamamen 236 taýar pozıtsııasy aıqyndaldy (47 jer qoınaýyn paıdalanýshy). 2025 jyldyń 9 aıynda 30 jer qoınaýyn paıdalanýshy 105 taýar pozıtsııasy boıynsha jalpy somasy 22,1 mlrd teńgege uzaq merzimdi sharttar jasasty. Oǵan burandaly soraptar, qubyrlar, sorapty-kompressorlyq qubyrlar, sorap shtangalary, fontandaý armatýrasy, hımııalyq ónimder, qubyrlyq soraptar, arnaıy kıim, arnaıy aıaq kıim, qolǵap, matrats, aýyz sý, shúberek jáne taǵy basqalary kiredi, — delingen aqparatta.
Aldyńǵy jyldarmen salystyrǵanda, jeke jer qoınaýyn paıdalanýshylar Energetıka mınıstrliginiń úılestirýi men qoldaýynyń arqasynda otandyq zaýyttarmen uzaq merzimdi sharttar kólemin edáýir ulǵaıtty.
Energetıka mınıstrliginiń bul baǵyttaǵy jumysy jalǵasyn tabady.
Eske salaıyq, buǵan deıin Aqtóbedegi jer qoınaýyn paıdalanýshylar eń úzdik qoljetimdi tehnıkalardy engizýge qulyqsyz ekendigi týraly jazdyq.