Jer qoınaýyn paıdalanýshylar byltyr ǵylymı zertteýge 8,9 mlrd teńge baǵyttady
ASTANA. KAZINFORM – Jaqyp Haırýshevtiń tóraǵalyǵymen Energetıka vıtse-mınıstri Erlan Aqbarovtyń jáne beıindi departamentter ókilderiniń qatysýymen Energetıka mınıstrligi Qoǵamdyq keńestiń otyrysy ótti.
Kún tártibindegi negizgi máseleler jergilikti qamtý, munaı-gaz sektoryna tsıfrlyq egizderdi engizý jáne ǵylymı-zertteý jáne tájirıbelik-konstrýktorlyq jumystardy qarjylandyrý boldy. Qatysýshylar jer qoınaýyn paıdalanýshylardyń óndirýge jumsalatyn shyǵyndardyń 1%-yn ǵylymı zertteýge bólý jónindegi mindettemeleriniń oryndalýyna erekshe nazar aýdardy.
Energetıka mınıstrliginiń málimetinshe, búginde Qazaqstanda jer qoınaýyn paıdalanýǵa arnalǵan 320 kelisimshart qoldanysta, onyń 291-i qarjylandyrý mindettemelerine ıe.
Olardyń ishinde 44 kelisimshartta ǵylymdy qarjylandyrý kelisimsharttyq qyzmet boıynsha jıyntyq jyldyq tabystan qarastyrylǵan, al 247 kelisimshart úlgilik kelisimshart negizinde jasalyp, ótken jyldyń qorytyndysy boıynsha óndirýge jumsalǵan naqty shyǵyndardyń 1%-yn aýdarýdy kózdeıdi. Usynylǵan derekterge sáıkes, 2025 jyldyń qorytyndysy boıynsha ǵylymı zertteýge 8,9 mlrd teńge baǵyttalǵan. Qarjylandyrý kólemi boıynsha «Qarajanbasmunaı», «Qojan» jáne «SNPS-Aqtóbemunaıgaz» kompanııalary kóshbasshylar qatarynda.
Budan bylaı ǵylymdy qarjylandyrý memlekettik bıýdjettiń arnaıy túsimderi sanatyna jatqyzyldy. 2026 jylǵy aqpanda kúshine engen jańa qaǵıdalar bul aýdarymdardy tolyq ortalyqtandyrýdy kózdeıdi. Endi qarjylandyrylatyn jobalar Energetıka mınıstrliginiń Ǵylymı-tehnıkalyq keńesi bekitetin basym baǵyttarǵa qatań sáıkes bolýy tıis, al olardy iske asyrý Ǵylym komıtetiniń rásimderi arqyly baǵdarlamalyq-nysanaly qarjylandyrý qaǵıdaty negizinde júzege asyrylady.
Sondaı-aq otyrys barysynda taraptar munaı-gaz salasyndaǵy derekterdiń ashyqtyǵyn qamtamasyz etýge jáne resýrstardy basqarý tıimdiligin arttyrýǵa baǵyttalǵan tsıfrlyq egizderdi engizý barysyn talqylady. Bul jumystar 2026 jylǵy ózekti tsıfrlyq kún tártibi aıasynda júzege asyrylyp jatyr.
Budan buryn
