Jer qoınaýyn paıdalanýdyń biryńǵaı platformasy tek memlekettiń menshiginde bolady
ASTANA. KAZINFORM — Búgin Májilistiń jalpy otyrysynda «Jer qoınaýy jáne jer qoınaýyn paıdalaný týraly» QR Kodeksine ózgerister men tolyqtyrýlar engizý týraly» Zańy ekinshi oqylymda qaralyp, qabyldandy.
- Qaralyp otyrǵan zań jobasy Memleket basshysynyń Qazaqstan halqyna Joldaýlarynda aıtylǵan tapsyrmalaryn iske asyrýǵa baǵyttalǵan. Parlament Májilisi zań jobasyn 2025 jyldyń 12 qarashasynda birinshi oqylymda maquldady. Indýstrııalyq sektordyń ınvestıtsııalyq tartymdylyǵyn arttyrý osy zańnyń negizgi maqsaty sanalady. Qujatty ekinshi oqylymǵa daıyndaý barysynda depýtattar, jumys toby jáne Bas komıtet zań jobasynyń erejelerine birqatar ózgerister engizýdi usyndy. Depýtattardyń eń mańyzdy túzetýleriniń biri – Jer qoınaýyn paıdalanýdyń biryńǵaı platformasy tek memlekettiń menshiginde bolady. Bul atalǵan platformanyń quramynda strategııalyq mańyzdy memlekettik resýrs sanalatyn geologııalyq aqparattyń bolýyna baılanysty. Sondyqtan onyń tutastyǵyn, qoljetimdiligin jáne qaýipsizdigin qamtamasyz etý boıynsha normalardy zańda bekitýimiz qajet, - dedi Májilis depýtaty Arman Qalyqov.
Budan bólek, Jer qoınaýyn paıdalanýdyń biryńǵaı platformasynyń jumys isteýin qamtamasyz etý geologııa salasyndaǵy Ulttyq operatorǵa júktelgen. Depýtattar geologııa salasyndaǵy Ulttyq operator (Ulttyq geologııalyq qyzmet) jekeshelendirýge jatpaıtynyn kózdeıtin asa mańyzdy túzetýdi engizdi. Qazaqstan Respýblıkasynyń Úkimeti atalǵan túzetýlerdi qoldady.
- Memleket basshysy Qasym-Jomart Toqaevtyń 2023 jylǵy 1 qyrkúıektegi Qazaqstan halqyna Joldaýynda aıtqan tapsyrmasyn iske asyrý maqsatynda depýtattar satyp alynatyn jumystar men kórsetiletin qyzmetterdegi elishilik qundylyq úlesin jetpis paıyzǵa deıin ulǵaıtýǵa baǵyttalǵan túzetýlerdi usyndy, - dedi depýtat.
Budan buryn harlanǵandaı, bıyl 12 qarashada Májilis «Jer qoınaýy jáne jer qoınaýyn paıdalaný týraly» QR Kodeksine ózgerister men tolyqtyrýlar engizý týraly» zań jobasyn birinshi oqylymda maquldady.
Sonymen qatar, jer qoınaýyn paıdalaný salasynda ashyqtyqty kúsheıtýge baǵyttalǵan osy zań boıynsha Májilistegi Ekologııa máseleleri jáne tabıǵat paıdalaný komıtetiniń tóraǵasy Edil Jańbyrshın pikir bildirdi.