Jer qoınaýyn paıdalanýdyń biryńǵaı platformasy iske qosyldy

ASTANA. KAZINFORM — Qazaqstanda Jer qoınaýyn paıdalanýdyń biryńǵaı platformasy iske qosyldy. Endi ótinim berý men ruqsat alý protsesiniń barlyq kezeńi onlaın formatta júzege asyrylady. Bul týraly Ortalyq kommýnıkatsııalar qyzmetinde ótken baspasóz konferentsııasynda QR ÓQM Geologııa komıteti tóraǵasynyń mindetin atqarýshy Qanat Erýbaev habarlady.

Onyń aıtýynsha, platformada 22 memlekettik qyzmet kórsetiledi, al 66 myńnan astam geologııalyq esep qoljetimdi. Zerttelgen aýmaqtardyń 109 myń kontýry kartalanyp, 1:50 000 masshtabtaǵy kartalaý jáne seısmobarlaý jobalarynyń nátıjeleri ashyq jarııalanady.

— Qazirgi ýaqytta perspektıvaly ýchaskelerdi jyldam ári dál boljaý úshin Big Data jáne jasandy ıntellekt júıesi engizilip jatyr. Bul geologııalyq barlaý táýekelderin azaıtyp, ınvestıtsııalyq sheshim qabyldaýdy jeńildetedi. Bastapqy geologııalyq aqparattyń 97,5%-y, ıaǵnı shamamen 4,7 mln elektrondyq formatqa kóshirildi. Jobany tolyq aıaqtaý 2028 jylǵa josparlanǵan, — dedi Qanat Erýbaev.

Osyǵan deıin Aral shógindi basseıninde júrgizilgen geologııalyq zertteýler nátıjesinde munaı men gaz qory bar 20-dan astam perspektıvaly alań anyqtalǵanyn jazǵan edik.