Jer qoınaýyn paıdalanýda reforma esh kedergige qaramastan jalǵasýǵa tıis - Prezıdent
ASTANA. KAZINFORM — Búgin Úkimettiń keńeıtilgen otyrysynda Prezıdent Qasym-Jomart Toqaev jer qoınaýyn paıdalaný salasyna qatysty tapsyrma berdi.
- Elimizdiń sırek kezdesetin metall kenishin, sonyń ishinde álemde suranys artyp kele jatqan lıtııdi óndirý men óńdeý áleýeti óte úlken. Demek biz osy salaǵa ınvestıtsııa men ozyq tehnologııalardy tartýymyz qajet. Bul rette sheteldik ınvestorlarǵa da, otandyq bıznesmenderge de basymdyq bergen jón, - dedi Qasym-Jomart Toqaev.
Prezıdent Qazaqstan naryǵyna geologııalyq barlaýmen aınalysatyn iri sheteldik kompanııalar kelgenin eske saldy.
- Jer qoınaýyn paıdalaný quqyǵyn ashyq ári qarapaıym tártippen bóletin Biryńǵaı platforma iske qosyldy. Parlament sessııasynyń sońyna deıin bul jumystyń zańnamalyq negizin qamtamasyz etý kerek. Jer qoınaýyn paıdalaný salasyndaǵy reforma esh kedergige qaramastan jalǵasýǵa tıis. Bul – prıntsıpti ustanym. Úkimet muny qatań túrde saqtaýy qajet, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Memleket basshysy 2024 jyldy elimiz oń kórsetkishtermen aıaqtaǵanyn aıtty.