Jer qoınaýyn paıdalaný tolyq tsıfrlandyryldy: 22 memlekettik qyzmet onlaın kórsetiledi

ASTANA. KAZINFORM — Jyl basynan beri Qazaqstanda Biryńǵaı jer qoınaýyn paıdalaný platformasy tolyǵymen iske qosyldy. Onda 22 memlekettik qyzmet tsıfrlandyryldy. Bul týraly ónerkásip jáne qurylys vıtse-mınıstri Jánnat Dúbirova aıtyp berdi. 

Spıkerdiń aıtýynsha, ınteraktıvti karta iske qosyldy, elektrondyq aýktsıondar jáne jazylym bonýstaryn onlaın tóleýge arnalǵan elektrondyq ámııan qyzmeti engizildi.

Bıyl Biryńǵaı jer qoınaýyn paıdalaný platformasy arqyly 729 lıtsenzııa berildi, tórt aýktsıon ótkizildi, jazylym bonýstary 45,4 mlrd teńge boldy.

— Endi jer telimin izdeý, lıtsenzııa alý jáne esep berý protsesteri tolyǵymen avtomattandyryldy, bul bıýrokratııany joıyp, salany ashyq ete túsedi. 2026 jyly biz geologııalyq esepterdi óńdeý úshin jasandy ıntellektini engizýdi josparlap otyrmyz. Bul Big Data biryńǵaı bazasyn qurýǵa, boljamdardyń dáldigin arttyrýǵa jáne geologııalyq aqparatty ınvestorlar úshin barynsha qoljetimdi etýge múmkindik beredi, — dedi Jánnat Dúbirova elordada Kongress ortalyqta.

Vıtse-mınıstr birinshi kezeń óziniń tıimdiligin dáleldegenin aıtýda — júıeniń prototıpi jasaldy jáne bastapqy derekqor qalyptastyryldy. Bolashaqta bul sheshim avtomattandyrylǵan analıtıkany qamtamasyz etedi, boljamnyń dáldigin jaqsartady jáne geologııalyq aqparatty ınvestorlar úshin ashyq, túsinikti jáne tartymdy etedi.

— Búgingi tańda Biryńǵaı platforma memlekettik qyzmetterden de kóp nárseni usynady. Bıyl biz alǵash ret taý-ken jáne karerlerdi paıdalaný erejeleri boıynsha onlaın esep berýdi iske qostyq, al jer qoınaýyn paıdalanýshylar óz esepterin tsıfrlyq formatta sátti tapsyrdy, — deıdi Jánnat Dúbirova.

Aıta keteıik, Qazaqstanda 103 paıdaly qazba men 10 myń ken orny memlekettik esepke alyndy. Paıdaly qazbalar qory 98 tonna altyn, 36 myń tonna mys, 11 mln tonna marganets jáne 1,3 mln tonnadan asa fosforıt kóleminde tolyqty.