Jer qoınaýyn paıdalaný: ishki óńdeý naryǵyn yntalandyratyn qatań talaptar engiziledi

ASTANA. KAZINFORM — Búgin Parlament Májilisinde «Jer qoınaýy jáne jer qoınaýyn paıdalaný týraly» kodeksine ózgerister men tolyqtyrýlar engizý týraly» zań jobasy tanystyryldy.

Qaralyp otyrǵan zań jobasy Memleket basshysynyń Joldaýlaryna negizdelip ázirlendi. Onyń basty maqsaty – jer qoınaýyna qol jetkizýdiń ashyqtyǵyn arttyrý, talaptardy buzǵany úshin quqyqtyq saldardy qatańdatý jáne tsıfrlandyrýdy jalǵastyrý arqyly jer qoınaýyn paıdalaný reformasyn nyǵaıtý jáne oǵan serpin berý.

- 2024 jyly jer qoınaýyn paıdalanýdyń aqparattyq júıesi – Biryńǵaı platforma iske qosyldy, ol paıdaly qazbalardyń qatty jáne keń taralǵan túrlerin barlaý men óndirý, sondaı-aq aqparat alýǵa qatysty bıznes-protsesterdiń barlyǵyn tsıfrlandyrdy. Qazirgi kezde bul júıede 22 memlekettik qyzmet kórsetiledi. Atalǵan júıeni Kodekste zań jobasymen bekitý kózdelip otyr, - dedi QR Ónerkásip jáne qurylys vıtse-mınıstri Iran Sharhan.

Onyń aıtýynsha, qazir paıdaly qatty qazbalardy barlaý úshin jer qoınaýyna qol jetkizý mehanızmi «birinshi ótinim» qaǵıdaty boıynsha, ıaǵnı bloktardy eki kezeńmen irikteý arqyly júzege asyrylady. Zań jobasynda bul eki kezeńdilik alynyp tastalyp, ótinimderdi tikeleı Biryńǵaı platforma arqyly berý eskerilip, bloktarǵa qoljetimdilik qamtamasyz etilgen.

- Qatysýshylar tarapynan teris maqsatta paıdalaný múmkindigin boldyrmaý úshin aýktsıon ótkizý tetiginiń ózi de kúsheıtiledi. Bul shara jańa ınvestorlardy tartý protsesin barynsha ashyq ári ádil etýge baǵyttalǵan. Ashyqtyqty kúsheıtý jer qoınaýy týraly aqparatty eseptilikte nemese Kodekske sáıkes usynylatyn ózge de qujattarda jasyrý jaǵdaılaryna da qatysty bolady. Beriletin lıtsenzııalar Biryńǵaı platformada ornalastyrylyp, olardyń sharttary men berý tártibi ashyqtyq ári básekelestik qaǵıdattaryna qatań sáıkes keletin bolady. Artyqshylyq berýge jol berilmeıdi, áıtpese mundaı lıtsenzııalar jaramsyz dep tanylady, - dedi vıtse-mınıstr.

Onyń sózine qaraǵanda, Memleket basshysynyń tapsyrmasy boıynsha 2021 jyly qurylǵan Ulttyq geologııalyq qyzmet qazirgi ýaqytta Geologııa komıtetiniń qaramaǵyndaǵy uıym jáne geologııalyq aqparatty basqarý jónindegi operator retinde bekitilgen. Túzetýlerde osy qyzmetti, sonyń ishinde Biryńǵaı platformany paıdalanýdy zańnamalyq turǵyda bekitý kózdelgen.

Zań jobasy aıasynda qatty paıdaly qazbalardy tájirıbelik-ónerkásiptik óndirý syltaýmen jasyryn óndirýge de tyıym salynady jáne mundaı jaǵdaılar lıtsenzııanyń dereý keri qaıtarylýyna ákeledi. Osy maqsatta taý-ken massasyn jáne topyraqty 1000 tekshe metrden astam kólemde alý, sondaı-aq jartylaı ónerkásiptik synamalardy alý qatań retteledi.

- Budan bólek, zań jobasynda paıdaly qatty qazbalar salasyndaǵy ındýstrııalyq-ınnovatsııalyq jobalardy iske asyrýǵa baqylaýdy kúsheıtý qarastyrylǵan. Mundaı jobalardy jer qoınaýy ýchaskesinen bólýge jol berilmeıdi. Jańa bastamalar boıynsha bolashaqta jumys istemeıtin jobalardyń shyǵýyn boldyrmaý maqsatynda joǵary ınvestıtsııalyq talaptar engiziledi jáne bul jobalar qarajattyń bar ekenin rastaıtyn tıisti qujattarmen qamtamasyz etilýi tıis, - dedi ol.

Vıtse-mınıstr mundaı jobalar boıynsha lıtsenzııalar ishki qaıta óńdeý naryǵyn yntalandyratyn qatań talaptarmen tolyqtyrylatynyn aıtty.

Budan buryn habarlanǵandaı, Pavlodarda jer qoınaýyn paıdalanýǵa arnalǵan lıtsenzııalar zańsyz resimdelgen.