Jer qoınaýyn paıdalaný salasynda birqatar ózgeris engizildi – Senat
ASTANA. KAZINFORM – Búgin Senattyń jalpy otyrysynda «Jer qoınaýy jáne jer qoınaýyn paıdalaný týraly» Kodeksine Memleket basshysynyń tapsyrmalaryn iske asyrý boıynsha ózgerister men tolyqtyrýlar engizý týraly» Zań eki oqylymda qaralyp, maquldandy.
Zańnyń maqsaty - Memleket basshysynyń barlyq geologııalyq aqparatty júıeleý men tsıfrlandyrýǵa qatysty tapsyrmalaryn iske asyrý. Qujat aıasynda geologııalyq aqparattyń ashyq derekqory bar salanyń negizgi tsıfrlyq ınfraqurylymy retinde Jer qoınaýyn paıdalanýdyń biryńǵaı platformasyn bekitý usynylady. Platforma qatty jáne keń taralǵan paıdaly qazbalardy barlaý jáne óndirý salasyndaǵy barlyq bıznes-protsesterdi qamtıdy.
- Platformany kómirsýtekter salasyndaǵy jer qoınaýy týraly aqparatty jınaýǵa, saqtaýǵa, taldaýǵa jáne óńdeýge arnalǵan Otyn-energetıka keshenin basqarýdyń biryńǵaı memlekettik júıesimen ıntegratsııalaý kózdeledi. Zańmen Ulttyq geologııalyq qyzmettiń geologııalyq aqparatty basqarý jáne Platformany paıdalaný jónindegi operator retinde mártebesi bekitiledi. Sondaı-aq, Jer qoınaýy jáne jer qoınaýyn paıdalaný týraly kodekske túzetýlermen paıdaly qazbalar men ýrandy barlaý jáne óndirý operatsııalaryn júrgizý kezinde jumystar men kórsetiletin qyzmetterdegi elishilik qundylyq úlesin 50%-dan 70%-ǵa deıin ulǵaıtý eskerilgen. Zańnyń jańashyldyqtarynyń biri - quny 14,5 mln AEK-ten asatyn iri ónerkásiptik-ınnovatsııalyq jobalardy iske asyratyn strategııalyq ınvestorlar úshin paıdaly qatty qazbalardy barlaý men óndirýge basym quqyqty bekitý, - delingen Senattyń Ekonomıkalyq saıasat, ınnovatsııalyq damý jáne kásipkerlik komıtetiniń málimetinde.
Munymen qosa, zańda jer qoınaýyn paıdalanýshylarǵa paıdaly qatty qazbalardy qaıta óńdeý jobalaryn iske asyrý kezinde ınvestıtsııalyq preferentsııalar berýge qatysty túzetýler engizý kózdeledi. Joǵaryda atalǵan preferentsııalar jańa Salyq kodeksinde eskerilgen. Paıdaly qatty qazbalardy qaıta óńdeý týraly kelisim jasalýy múmkin jer qoınaýyn paıdalanýshynyń ınvestıtsııalarynyń eń az kólemi 7 mln-nan 70 mln AEK-ke deıin ulǵaıtyldy.
- eseptilikte jer qoınaýy jáne jer qoınaýyn paıdalaný týraly málimetterdi jasyrǵany nemese jalǵan málimet bergeni úshin jaýapkershilikti kúsheıtý;
- jer qoınaýyn paıdalaný saldaryn joıý rásimderi kezinde jer qoınaýyn zertteý jónindegi ýákiletti organnyń qatysýy;
- ruqsatsyz, sol sııaqty berilgen ruqsat talaptaryn buza otyryp, paıdaly qatty qazbalardy barlaý ýchaskesinde taý-ken massasyn alýǵa nemese topyraqtyń ornyn aýystyrýǵa tyıym salý bóliginde jáne basqa túzetýler engiziledi.
Buǵan deıin Jer qoınaýyn paıdalanýdyń biryńǵaı platformasy tek memlekettiń menshiginde bolatynyn jazǵan edik.