Jer qoınaýyn paıdalaný salasynda 40 mln dollarlyq ınvestıtsııalyq joba qoldaý tapty
ASTANA. KAZINFORM - Investorlardyń quqyqtaryn qorǵaý komıteti sheteldik ınvestordyń jalpy somasy 40 mln dollardan asatyn jobalaryn jalǵastyrýǵa kómektesti, dep habarlaıdy QR Bas prokýratýrasynyń Investorlardyń quqyqtaryn qorǵaý komıteti.
Komıtet elimizde jer qoınaýyn paıdalaný salasynda jobalardy iske asyryp jatqan MQ EMIRATES GROUP Ltd. kompanııasyn súıemeldedi. Kompanııa tórt qatty paıdaly qazbalar ken orny boıynsha jer qoınaýyn paıdalaný quqyǵyn alýǵa arnalǵan aýktsıonda jeńimpaz atanyp, bıýdjetke 900 mln teńgeden astam bastapqy bonýs tólegen. Investıtsııasynyń jalpy kólemi 40 mln dollardan asady.
Investor Komıtetke ýákiletti memlekettik organnyń qajetti qujattardy tapsyrý merzimin uzartýdan bas tartýyna baılanysty júgindi. Ótinishti qaraý barysynda qujattardyń edáýir bóligi daıyn ekeni anyqtaldy: kompanııa tórt óńirde qoǵamdyq tyńdaýlar ótkizip, «Soltústik Kóptas» ken orny boıynsha oń ekologııalyq qorytyndy alǵan.
Ótinishti qaraý qorytyndysy boıynsha memlekettik organ ekologııalyq ruqsattardy usyný merzimin bir jylǵa uzartty. Qabyldanǵan sheshim ınvestıtsııalyq jobalardy jalǵastyrýǵa jáne Qazaqstandaǵy sheteldik ınvestıtsııalardy saqtap qalýǵa múmkindik beredi.
Osyǵan qaraı quqyǵy buzylyp, ákimshilik kedergilerge tap bolǵan ınvestorlarǵa 115 Call-ortalyǵyna júginý usynylady.
Osyǵan deıin habarlaǵanymyzdaı, ShQO-da prokýratýra aralasqannan keıin 811 turǵyn qajetti dári-dármekpen qamtamasyz etildi.
