Jer qoınaýy týraly zań az zerttelgen aýmaqtardyń áleýetin ashady - mınıstrlik
ASTANA. KAZINFORM – Ótken aptada Memleket basshysy «Jer qoınaýy jáne jer qoınaýyn paıdalaný týraly kodekske ózgerister men tolyqtyrýlar engizý týraly» Zańǵa qol qoıdy. Bul týraly Energetıka mınıstrligi habarlady.
Vedomstvonyń málimetinshe, qujat kómirsýtekter men ýrandy geologııalyq barlaýǵa ınvestıtsııalardy aýqymdy túrde tartýǵa, sondaı-aq jer qoınaýyn paıdalanýshylar úshin ákimshilik kedergilerdi azaıtýǵa baǵyttalǵan.
Zańdaǵy negizgi jańalyqtardyń biri – az zerttelgen aýmaqtarda barlaý jáne óndirý boıynsha arnaıy kelisimshart túriniń engizilýi. Bul norma ınvestorlar úshin jańa quqyqtyq tetik qalyptastyrady. Endi óz qarajaty esebinen jer qoınaýyn geologııalyq zertteýge daıyn kompanııalar keıingi kezeńde jer qoınaýyn paıdalanýǵa basym quqyq alady. Mundaı tásil barlaý jumystaryna jeke kapıtaldy tartýdy yntalandyryp, geologııalyq táýekelderdi tómendetýge múmkindik beredi.
Mınıstrlik atap ótkendeı, qabyldanǵan ózgerister el aýmaǵynyń geologııalyq zerttelý deńgeıin arttyrýǵa baǵyttalǵan. Az zerttelgen óńirlerdi aınalymǵa engizý kómirsýtekterdiń jańa qorlaryn anyqtaýǵa jáne uzaq merzimdi perspektıvada energetıkalyq qaýipsizdikti nyǵaıtýǵa jaǵdaı jasaıdy.
- Sonymen qatar zańnamalyq túzetýler óndiristik protsesterdi jeńildetedi. Endi jer qoınaýyn paıdalanýshylar qoldanystaǵy óndirý kelisimsharttary aıasynda jer ústindegi ýchaskeniń shekaralaryn ózgertpeı-aq, bes myń metrden tómen tereńdikte qosymsha barlaý jumystaryn júrgize alady. Bul sheshim tereń qabattardy jedel zertteýge jáne artyq bıýrokratııalyq rásimdersiz resýrs bazasyn keńeıtýge múmkindik beredi, - delingen aqparatta.
Zań normalary naryqtaǵy básekelestikti damytýǵa da baǵyttalǵan. Ulttyq kompanııalardyń tikeleı kelissózder júrgizý úshin ýchaskelerdi rezervte ustap turý merzimderine shekteý engizildi. Bul perspektıvaly aýmaqtardyń uzaq ýaqyt boıy paıdalanylmaı qalýyna jol bermeı, olardy naqty ınvestorlarǵa jedel usynýǵa múmkindik beredi. Sonymen qatar strategııalyq mańyzy bar ýran salasynda memlekettiń múddelerin qorǵaýǵa baǵyttalǵan normalar jeke blok retinde kózdelgen.
Resýrstardy utymdy paıdalaný men sapaly memlekettik saraptamany qamtamasyz etý maqsatynda kómirsýtekter qorlary jónindegi Memlekettik komıssııanyń qyzmet etý merzimi 2030 jylǵa deıin uzartyldy.
Energetıka mınıstrliginiń málimetinshe, qabyldanǵan zańnamalyq ózgerister ınvestıtsııalyq ahýaldy jaqsartyp, ekonomıkanyń óndirýshi jáne qaıta óńdeý sektorlaryna kapıtal aǵynyn arttyrýǵa qosymsha serpin beredi.