Jer komıssııasynan bas tartyp, tsıfrlandyrý júıesine kóshý kerek – agenttik sarapshysy
Bul týraly «Aýyl» halyqtyq-demokratııalyq patrıottyq partııasy ótkizgen semınarda Sybaılas jemqorlyqqa qarsy agenttiktiń janyndaǵy jer máseleleri jónindegi monıtorıng tobynyń negizgi sarapshysy Baqytjan Bazarbek aıtty, dep habarlaıdy QazAqparat tilshisi.
«Jer máseleleri jónindegi monıtorıng tobynyń sarapshysy bolyp júrgenime kóp jyl boldy. Saraptamalyq jumystar aıasynda Qazaqstannyń 14 oblysynda, Almaty oblysynyń barlyq aýdanynda tikeleı jerge qatysty máselelerge aralasyp, halyqqa túsindirý jumystaryn júrgizý nátıjesinde kóp nársege kózimiz jetip otyr. Partııanyń óz aldyna qoıatyn birinshi máselesi – aýyl sharýashylyǵy maqsatynda qoldanylatyn jerler. Aýyl sharýashyly maqsatynda qoldanylatyn jerler elimizdegi jer aýmaǵynyń 23%-yn quraıdy. Ókinishke qaraı, mundaı maqsattaǵy jerlerge qatysy másele kóp. Osyǵan qatysty negizgi máseleniń biri – jer komıssııasy. Aýyl sharýashylyǵyndaǵy jer qatynastaryna baılanysty sybaılas jemqorlyq jaǵdaılarynyń kóbi jer komıssııasymen tikeleı baılanysty. Azamat aryzdy jergilikti atqarýshy organyna túsirýi kerek. Jergilikti atqarýshy organ aryzdy ýákiletti organǵa jiberýi kerek. Ýákiletti organ jerdi tıisti maqsatqa sáıkes paıdalaný múmkindigin qalyptastyryp, aryzdy jer komıssııasyna jiberedi. Jer komıısııasynyń quramy keminde 9 músheden turýy tıis. Keı aýdanda 11 múshe bolsa, keı aýdanda 33 múshege deıin bolady. Zań boıynsha, jer komıssııasy quramynyń 50%-y qoǵam ókilderi bolýy kerek. Ákimder jer komıssııasyn qurǵan kezde osy zańdylyqty saqtamaıdy», - deıdi Sybaılas jemqorlyqqa qarsy agenttiktiń janyndaǵy jer máseleleri jónindegi monıtorıng tobynyń negizgi sarapshysy Baqytjan Bazarbek.
Onyń aıtýynsha, barlyq oblys boıynsha 113 jer komıssııasynyń quramyn tekserýge týra kelgen.
«Aýdandyq dárejedegi jer komıssııasynyń quramyn teksergen kezde anyqtalǵany: ákimder jer komıssııasyn qurǵan kezde qoǵam ókilderi retinde ákim orynbasary, jer qatynastary bólimi, aýyl sharýashylyǵy bólimi basshylarynyń týǵan-týystaryn sııaqty tikeleı ózine táýeldi adamdardy kirgizgen. «Aýyl» partııasynyń» atynan saılaýǵa túsetinderge úndeý: aldaǵy 3-4 jylda jer komıssııasynan tolyǵymen bas tartyp, jerdi jalǵa berýge baılanysty barlyq másele tsıfrlyq formatqa ótýi kerek. Birinshiden, jer komıssııasy memlekettik bıýdjetten qomaqty qarajatty qajet etedi. Ekinshiden, sybaılas jemqorlyq qaýip-qaterlerin qalyptastyrady. Aýyl sharýashylyǵy mınıstrliginiń, Jer resýrstaryn basqarý komıtetiniń, «Azamattarǵa arnalǵan úkimet» memlekettik korporatsııasy aıasynda jer komıssııasynyń mártebesine baılanysty kóp talqylaý ótkizdik. Osy talqylaý barysynda mende osyndaı oı qalyptasty», - deıdi ol.
