Jer komıssııasy qaıtarǵan 13,7 mln gektar jerdiń 7,5 mln gektary áli ıgerilmeı jatyr

ASTANA. KAZINFORM – Premer-mınıstr Oljas Bektenov Májilis depýtatynyń saýalyna joldaǵan jaýapta memlekettik jer komıssııasy qaıtarǵan jer telimderiniń jaı-kúıinen málimet berdi.

- 2022 jyldan bastap ıgerilmeı jatqan jáne zańsyz jolmen berilip ketken jer telimderin qaıtarý jónindegi komıssııa jumys isteıdi. Komıssııa jumysyn bastaǵannan beri 13,7 mln gektar jer memleket menshigine qaıtaryldy. Onyń 6,2 mln gektary jergilikti halyqqa qaıta úlestirildi. Qalǵan 7,5 mln gektar bosalqy jer sanatyna jatqyzyldy jáne ázirge aýyl sharýashylyǵy aınalymyna tartylǵan joq, - dep jazady Oljas Bektenov.

Resmı jaýapta atalǵan telimderdi oblystar arasynda qaıta bólýdiń egjeı-tegjeıli jospary ázirlengeni aıtylǵan.

- Sonymen qatar ákimdikterge naqty jaıylym tapshylyǵy týraly aqparat jetkizildi. Bul aqparat qaıta bólý josparyn bekitý kezinde eskeriledi. Atalǵan jumystardy 2026 jyldyń ortasyna deıin aıaqtaý josparlanyp otyr, - deıdi Premer-mınıstr.

Al mamyr aıyndaǵy málimet boıynsha memlekettik jer komıssııasy 12,8 mln gektar jerdi qaıtarǵan bolatyn.