Jer komıssııalarynyń jumysy toqtatylady — AShM
ASTANA. KAZINFORM — Qazaqstanda jer qatynastary salasyndaǵy rásimderdi ońtaılandyrý maqsatynda jer komıssııalarynyń qyzmeti toqtatylyp, jerge qatysty memlekettik qyzmetter tolyq tsıfrlyq formatqa kóshiriledi. Bul týraly Aýyl sharýashylyǵy mınıstrligi Jer jáne sý resýrstaryn basqarý komıtetiniń tóraǵasy Murat Temirjanov málimdedi.
Onyń aıtýynsha, kelesi jyldan bastap jer berý máseleleri boıynsha sheshim qabyldaıtyn jer komıssııalary jumysyn toqtatady. Budan bylaı azamattar jerge qatysty memlekettik qyzmetterdi HQKO arqyly nemese elektrondy formatta ótinim berý jolymen ala alady.
— Barlyq rásim tsıfrlyq formatqa kóshiriledi. Azamattarǵa komıssııa otyrystaryna qatysý nemese qosymsha qujat jınaý qajettiligi bolmaıdy, — dedi Murat Temirjanov.
Brıfıng barysynda jer resýrstary salasyndaǵy aqparattyń ashyqtyǵyn arttyrý máselesi de qozǵaldy. Qazirgi tańda jerkarta.kz platformasynda oblystar men aýdandar bólinisinde jer telimderi, jer paıdalanýshylar jáne jerdiń nysanaly maqsaty týraly málimetter qoljetimdi.
Sonymen qatar, Murat Temirjanovtyń aıtýynsha, 2026 jyldyń qańtar aıynda jer qatynastary salasynda úsh jańa memlekettik qyzmet iske qosylǵan. Sonyń biri — jerdi jalǵa alý quqyǵyn uzartý qyzmeti. Buryn bul úshin jer paıdalanýshylar jergilikti atqarýshy organǵa keminde úsh aı buryn júginýge májbúr bolǵan. Qazirgi tańda bul protsess tolyq avtomattandyrylyp, ótinim berý elektrondy formatta júzege asyrylady.
Aıta keteıik, buǵan deıin Shyǵys Qazaqstan oblysynda bos jatqan jaıylym men egistik jerlerdi paıdalanýdy baqylaý kúsheıtilgeni jaıly jazǵan edik.