Jer kezegine turǵan qyzylordalyqtar negizinen aýdan ortalyqtarynda
QYZYLORDA. KAZINFORM — Qyzylorda oblysynda jer kezegine turǵandardyń biryńǵaı esebi jasalmaıdy. Oblystyq aýyl sharýashylyǵy jáne jer qatynastary basqarmasy bul týraly málimetti árbir aýdan, qala nemese kent ákimdikteri jeke usynatynyn habarlady.
Óńirde 7 aýdan men oblystyq mańyzdaǵy 1 qala bar. Resmı suraý salý barysynda belgili bolǵany, oblys boıynsha kezektiń kóptigi jóninen Qyzylorda qalasy alda tur.
Qalalyq aýyl sharýashylyǵy jáne jer qatynastary bóliminiń málimetinshe, memleketten beriletin on sotyqty kútkender sany 71 myńnan asady.
Onyń aldy 20 jyl buryn kezekke turǵan.
— 2005 jyly 11 163 azamat tirkelgen bolsa, onyń ishinde qalǵan 2 387 adamǵa jer ýchaskelerin tabystaý jumystary júrgizilip jatyr. Taldaý nátıjesinde anyqtalǵan ýaqytyly ári maqsatty túrde ıgerilmegen jer ýchaskeleri zań talabyna jáne tıisti algorıtmderge sáıkes memleketke qaıtarylady. Osylaısha ıgerýsiz aýmaqty kelesi kezektegi turǵyndarǵa tabystaý múmkindigi artady, — delingen habarlamada.
Resmı saýalymyzǵa sondaı-aq Qazaly, Qarmaqshy, Jalaǵash, Syrdarııa jáne Qarmaqshy aýdanynyń ákimdikteri jaýap berdi.
Qazaly aýdany boıynsha jer kezegine barlyǵy 13 693 adam tirkelgen. Onyń 9969-y Áıteke bı kentinen, 3163-i Qazaly qalasynan, 561-i Ǵ.Muratbaev aýyldyq okrýginen. Qalǵan aýyldyq okrýgter boıynsha kezektilik qalyptaspaǵan.
Qarmaqshy aýdanynda 3 eldi meken boıynsha turǵyn úı qurylysyn salý maqsatynda jer alý úshin 6197 adam ótinish bergen.
Onyń ishinde Tóretam kenti (3185 adam) men Aqaı aýylynda (2621 adam) 2007 jyldan beri on sotyqqa qoly jetpeı júrgender bar. Josaly kentinde 391 adamnyń aldy 2018 jyly esepte tur.
— Tóretam kenti men Aqaı eldi mekeni aýmaǵyndaǵy jer ýchaskeleri «Baıqońyr» ǵarysh aılaǵy úshin Reseı Federatsııasyna uzaq merzimge jalǵa berilgen aýmaq quramynda bolǵandyqtan ótinishterdi qamtý múmkindigi joq. Qyzylorda oblysy ákimdigi tarapynan Úkimet tapsyrmasymen Tóretam kenti men Aqaı aýyly esebinen Baıqońyr ǵarysh kesheni aýmaǵynda eldi meken jerin ulǵaıtý jáne jaıylymdyq jer ýchaskelerin qosyp berý baǵytynda jumys atqarylyp jatyr, — delingen Qarmaqshy aýdany ákimdiginiń habarlamasynda.
Jańaqorǵan aýdanynda kezek negizinen aýdan ortalyǵynda qalyptasyp otyr. Qazirgi tańda Jańaqorǵan kentinde kezekke turǵandar sany — 11 949 adam.
— 2015 jylǵy jaǵdaı boıynsha 73 adamnyń tizimi ázirlenip, onyń 18-i usynylǵan jer ýchaskesin alýǵa kelisim berip, qujattandyryldy. Búginde tizimdi qaıta qalyptastyrý jumystary qolǵa alyndy, — delingen ákimdik jaýabynda.
Jalaǵash aýdanynyń ákimdigi usynǵan málimetke súıensek, Jalaǵash kentindegi kezek sany — 2922.
Jer kodeksiniń talabyna saı jer paıdalaný quqyǵy merziminiń ótýine baılanysty 2009 jyldyń basynda kezekte turǵan 41 adamǵa jer telimi paıdalaný (jaldaý) quqyǵymen 3 jyl merzimge tabystaldy.
— Qazirgi kezde 14 adam jerin kóterip, irgetasyn quıyp, úı qurylysyn bastady. Al 7 turǵyn túrli sebeptermen tabystalǵan jer ýchaskelerin óz erkimen qaıtardy, — delingen habarlamada.
Syrdarııa aýdanynda úı salý úshin 1624 adam jer telimin surap, ótinish bildirgen. 2017 jyly aýdan ortalyǵy Tereńózek kentinen 173 ýchaske ashylyp, kezegimen jer berildi.
Aýdan ákimdiginiń málimetinshe, byltyr jańa qonystaný aımaǵynda 373 jer ýchaskesin qamtıtyn alań ashyldy. Osy kúni mamandar jer ýchaskelerine quqyq tabystaý qujattaryn rásimdep jatyr.
Jer kezegi jónindegi saýalymyzǵa Aral jáne Shıeli aýdanynyń ákimdikteri jaýap bergen joq.
Biz buǵan deıin Qyzylorda qalasynda 2005 jylǵy kezektegi azamattardyń jer alýǵa qyzyǵýshylyǵy tómen bolǵandyqtan sol ýaqyttaǵy kezekti aıaqtaý múmkin bolmaı otyrǵanyn jazǵanbyz.