Jer qazý jumystary kezinde gaz ben sý qubyrynyń zaqymdanýynan elordanyń birqatar úıleri gazsyz jáne sýsyz qaldy - QR TJM
ASTANA. Mamyrdyń 29-y. QazAqparat - Jer qazý jumystary kezinde gaz ben sý qubyrynyń zaqymdanýynan elordanyń birqatar úıleri gazsyz jáne sýsyz qaldy,
dep habarlaıdy QR Tótenshe jaǵdaılar mınıstrliginiń baspasóz qyzmeti.
Mamyrdyń 28-i kúni saǵat 17.15-de «Alsın-Alarko» JShS-niń jer qazý jumystary barysynda Saryarqa aýdanyndaǵy Qutpanov kóshesindegi dıametri 89 mm bolatyn gaz qubyry zaqymdanǵan. Osynyń nátıjesinde Birjan sal kóshesindegi №1,3,5,5/1 úıler, Qutpanov kóshesindegi №3 jáne №4 úıler, Gete kóshesi boıyndaǵy №10 úı, Aqjaıyq kóshesindegi №13/1 úı gazsyz qaldy. Tótenshe jaǵdaıdyń zardabyn joıý úshin «Gaz Qyzmet» JShS apat brıgadasy jumysqa kiristi.
Sonymen qatar, osy jerde 100 mm dıametrli sý qubyry buzylǵan. Osynyń saldarynan Qutpanov kóshesindegi №4 úı sýsyz qaldy. Qazirgi ýaqytta «Astana - sý arnasy» MKM sý jetkizýdi uıymdastyryp otyr. Jóndeý-qalpyna keltirý jumystary búgin, mamyrdyń 29-y júrgiziledi dep josparlanǵan.
