Jer qadirin bilmeıtin, paıda tabýdyń joly retinde qarastyratyn adamdar qajet emes - Toqaev
ASTANA. KAZINFORM – Agrarlyq sektor – memleketimizdiń jahandyq básekege qabilettiligine yqpal etetin negizgi faktorlardyń biri. Bul týraly Aýyl sharýashylyǵy eńbekkerleriniń ІІІ forýmynda Memleket basshysy Qasym-Jomart Toqaev aıtty.
- Memleket týǵan jeriniń órkendeýine úles qosatyn, aýyldastarynyń ıgiligin oılaıtyn adal fermerler men isker sharýalarǵa árdaıym qoldaý kórsetedi. Alaıda jerden paıda taýyp júrgenimen úlken qalada nemese shetelde turatyn bıznesmender de bar. Olar tipti ózderiniń sharýashylyqtaryna barmaıdy, kóbine áleýmettik jaýapkershilik tanytýǵa qulyqty emes, otandastaryna jany ashymaıdy, adamdardyń muń-muqtajyn túsine bermeıdi, - dedi Qasym-Jomart Toqaev.
Memleket basshysy osy oraıda zańdy saýal týatynyna nazar aýdartty.
- Bizge jer qadirin bilmeıtin, halyqtan alys, aýyl sharýashylyǵyn tek paıda tabýdyń joly retinde qarastyratyn adamdar qajet pe? Menińshe, jaýaby anyq. Qajet emes. Endeshe zań júzinde sharalar qabyldaý kerek. Bul salada kásippen aınalysatyndardyń bári, eń aldymen, aýyldaǵy turmys sapasyn jaqsartýdy oılaýǵa tıis. Agrarlyq sektor – memleketimizdiń jahandyq básekege qabilettiligine yqpal etetin negizgi faktorlardyń biri. Ásirese, turaqsyz zamanda onyń ózektiligi arta tústi, - dedi Prezıdent.