Jer ıelerine tekserý týraly eskertý SMS arqyly joldanýy múmkin

ASTANA. KAZINFORM – Jer ıelerine memlekettik tekserýler týraly habarlama endi hat arqyly emes, SMS arqyly habarlanýy múmkin. Májiliste osyndaı usynys aıtylyp, jaýapty organdardyń ókilderi qoldaý bildirdi.

- Kásipkerlik kodekstiń talaptary boıynsha, jer teliminiń ıgerilýin teksererdiń aldynda ıesine poshta arqyly hat joldap, jazbasha eskertedi. Biraq jerdi zańsyz alǵandar, durys ıgermeı jatqan bıznesmender, sonyń ishinde alaıaqtar, olıgarhtar poshtanyń hatyn alýdan qashady. Sonyń kesirinen jer resýrsyn basqarý organynyń ınspektorlary tekserýdi bastaı almaı jatady. Qazir salyq organdary men polıtsııada SMS habarlama tetigi bar. Osy jerdi tekserý tájirıbesinde telim ıelerine poshta hatynyń ornyna SMS habarlama jiberý tásilin nege qoldanbasqa? Onda qazirgideı qıyndyqqa ushyramaıtyn edik, - dedi depýtat Baqytjan Bazarbek.

Tsıfrlyq damý, ınnovatsııalar jáne aeroǵarysh ónerkásibi vıtse-mınıstri Ashat Orazbek usynysty qoldaıtynyn, alaıda basqa mınıstrlikpen aqyldasyp qana naqty sheshim qabyldaýǵa bolatynyn aıtty.

Al «Qazposhta» aktsıonerlik qoǵamynyń basqarma tóraıymy Ásel Janasova bıyl «Qazposhta» arqyly joldanǵan hattan jaltarýdyń eki oqıǵasy tirkelgenin aıtty.

- Bıyl osyndaı eki keıs boldy. Biz ol faktilerdi quqyq qorǵaý organdaryna joldadyq. Bizde negizi SMS habarlama jiberý, onyń jetken-jetpegenin anyqtaıtyn servıster bar. Tsıfrlyq damý mınıstrligimen birge jasap, kelesi jyly ony tııanaqtaımyz, - dedi «Qazposhta» basshysy.