Jer halyqqa ıgiligin tıgizýi qajet - Arman Ómirzaqov

KÓKShETAÝ. QazAqparat - Jer halyqqa ıgiligin tıgizýi qajet. Mundaı pikirdi Aqmola oblystyq ekologııa jáne ólketaný oqý-ádistemelik ortalyǵynyń dırektory Arman Ómirzaqov aıtty, dep habarlaıdy QazAqparat tilshisi.

«Joldaýda ishki saıası máseleler, ekonomıkany jańǵyrtý, halyqty áleýmettik qamsyzdandyrý jáne ınfraqurylymdy damytý sııaqty búgingi kúnniń ózekti máseleleri qamtyldy. Bul qujat elimizdiń damýy úshin aldaǵy kezeńde atqarylýy tıis jumystarǵa baǵyt-baǵdar bola alady.

Bilim berý sapasyn jaqsartýda «Dıplommen – aýylǵa» baǵdarlamasynyń aıasyn keńeıtip, jumysty jańa deńgeıde jalǵastyrýdyń, daryndy aýyl jastaryn iriktep, otandyq jáne sheteldik joǵary oqý oryndaryna daıyndaý máselesi kóńilge qondy», - deıdi Arman Ómirzaqov.

Sonymen qatar, ol Qazaqstan Prezıdenti Qazaqstan halqyna Joldaýy kezinde jerdi tıimdi paıdalaný, jergilikti bılik organdary jumysynyń tıimdiligin arttyrý týraly taqyryptaryn da qozǵaǵanyn atap ótti.

«Joldaýda aıqyndalǵan maqsattardyń júzege asýyna biz de atsalysyp, jumyla jumys jasaýymyz qajet. Osy is-sharalardyń oryndalýy halqymyzdyń áleýmettik jaǵdaıynyń ósýine septigin tıgizedi dep oılaımyn. Prezıdent jerimizdiń sheteldikterge satylmaıtynyn, oǵan jol berilmeıtinin aıtty. Aldaǵy ýaqytta paıdanylmaıtyn aýyl sharýashylyǵy jerleri tárkilenip, jermen jumys isteıtin adamdarǵa beriledi. Bul máseleni sheshpeı, otandyq agroóndiristik keshendi sapaly damytý múmkin emes. Búgingi tańda et óndirisin kóbeıtý azyqtyq daqyldardy ósiretin jerdiń jetispeýshiligine tirelip otyr. Aýyl sharýashylyǵynyń ónimdiligin arttyrý selodaǵy sapaly turmystyń jaǵdaıyna tikeleı baılanysty.

Joldaýda atap kórsetilip, Úkimetke tapsyrma retinde berilgen – bilim jáne densaýlyq saqtaý salasyn jetildirý, eńbekaqyny kóbeıtý – mine, osy sharalardyń bári qazaqstandyqtardyń ómir sapasynyń artýyna kepil bolary sózsiz. Men bıylǵy Joldaýdaǵy mindetterdiń elimizdiń qaryshtap damýyna úles qosatyndyǵyna nyq senemin!», dep túıindedi Arman Ómirzaqov.