Jer dúmpýinen keıin Almaty qalasy men oblysynda mektep jumysy toqtady ma

ALMATY. KAZINFORM — Almatyda búgin, 4 qarashada saǵat 12:45–te jer silkindi.

Jer dúmpýiniń qarqyndylyǵy Almaty qalasynda 3 ball, al Almaty oblysynyń ár aýdanynda 2-3 ball aralyǵynda boldy.

Kazinform agenttigi tótenshe jaǵdaıǵa baılanysty qala men oblys mektepteriniń jumysy týraly vedomstvolarǵa saýal joldady.

Almaty qalasy bilim basqarmasynyń jaýabyna sáıkes, jer silkinisi kezinde oqýshylar men stýdentter qaýipsiz jerge evakýatsııalanǵan. Alaıda jarty saǵattan keıin sabaqtaryn qalypty rejımde jalǵastyrǵan.

— Dabyl sıgnalynan keıin mektepke deıingi, orta, kásiptik-tehnıkalyq bilim berý mekemeleriniń pedagogıkalyq qyzmetkerleri seısmıkalyq qaýip tóngendegi is-áreket algorıtmine sáıkes áreket júrgizdi. 15-20 mınýttan keıin oqý protsesi qalypty rejımde jalǵastyryldy, — dep habarlady.

Almaty oblysynyń ákimdigi de óńir mekteriniń jumysy toqtamaǵanyn habarlady.

— Almaty oblysy boıynsha bilim berý mekemelerinde sabaqtar toqtatylǵan joq. Jer silkinisine baılanysty oqýshylar qaýipsizdik maqsatynda ashyq alańdarǵa shyǵaryldy. Qazirgi tańda jaǵdaı turaqty, — delingen oblys ákimdiginiń jaýabynda.

Eske salaıyq, Almaty ákimdigi barlyq habarlandyrý júıesi shtattyq rejımde jumys istegenin habarlady.

Almaty tótenshe jaǵdaılar departamenti ókilderi qalada tirkelgen jer silkinisine qatysty túsinik berdi.