Jer dúmpýine baılanysty habarlandyrýdyń jumys algortımi tekseriledi — TJD

ALMATY. KAZINFORM — Almaty turǵyndaryna jer silkinisine baılanysty eskertý kelip, qalada sırenalar oınady. 

Alaıda áleýmettik jelide almatylyqtar jer dúmpýi sezilmegenin aıtyp jatyr. Kazinform tilshileri baıqaǵandaı qala ishinde dúrbeleń ne adamdar jappaı dalaǵa shyǵyp ketken joq.

Almaty qalasynyń Tótenshe jaǵdaılar departamenti seısmodatchıkterdiń derekteri boıynsha Qyrǵyzstan aýmaǵynda seısmıkalyq belsendilik tirkelgenin habarlady. Biraq ol halyq pen ınfraqurylym nysandaryna qaýip tóndirmedi.

— Seısmıkalyq oqıǵa týraly habarlama avtomatty túrde jiberildi. Bul habarlama júıeniń testilik rejımdegi jumysynyń bir bóligi jáne qate emes. Ulttyq seısmologııalyq baqylaý jáne zertteý ortalyǵynyń datchıkteri men jabdyqtaryn MassAlert jappaı habarlaý júıesine baılanystyrý jumystaryn júrgizip jatyr, — dep habarlady TJD.

Resmı málimetine sáıkes, mamandar seısmıkalyq stantsııalar men datchıkterdi zerttep, oqıǵanyń barlyq mán-jaıyn anyqtaıdy.

— Halyqqa joldanatyn habarlamalar bolashaqta barynsha naqty ári túsinikti bolýy úshin parametrler men algorıtmderdi naqtylaý jáne baptaý jumystary júrgizilýde, — dep málimdedi departament.

Eske salaıyq, QR TJM «SBZUǴO» JShS seısmıkalyq stantsııalar jelisi 2025 jylǵy 23 qazanda Astana ýaqyty boıynsha 12:20 jer silkinisin tirkeldi. Jer silkinisi oshaǵy Qyrǵyzstan aýmaǵynda Almaty qalasynan ońtústik-batysqa qaraı 136 km jerde ornalasqan.

Bıyl qyrkúıek aıynda da jer dúmpýine baılanysty MasAlert júıesi avtomatty túrde iske qosylǵan edi.