Jer daýy men Aqtóbedegi terakt Qazaqstannyń ımıdjine keri yqpalyn tıgizgen joq - QR SІM

ASTANA. QazAqparat - Búgin halyq aldynda esep bergen Syrtqy ister mınıstri Erlan Ydyrysov «kóktemde bolǵan jer máselesi men jýyrda Aqtóbede oryn alǵan terakt Qazaqstannyń ımıdjine, ınvestıtsııalyq jaǵdaıyna qalaı yqpal etti?» degen suraqqa jaýap berdi.

«Jer máselesi - qoǵamdyq mańyzy bar másele. Sondyqtan, Memleket basshysy osy iske ózi aralasa otyryp, jer qoǵamnyń basty qundylyǵy ekenin kórsetti. Pikir almasý úshin órkenıetti túrde dıalog ornattyq. Qoǵam úshin asa mańyzdy máselede dıalog ornata otyryp, shet eldik áriptesterimizdiń oıyna jaqsy pikir uıalattyq. Sondyqtan, keıbir taraptar jaǵdaıdy ýshyqtyra almady. Bul áreketimiz áriptesterimiz tarapynan jaqsy baǵalandy»,-degen vedomstvo basshysy Aqtóbedegi jaǵdaı Qazaqstannyń saıası ımıdjine de keri áser etpegenin aıtty.

«Al, terrorızmge toqtalsaq, meniń aıtarym, Qazaqstan men álemniń BAQ-tary «Aqtóbedegi jaǵdaı Qazaqstan úshin óte sırek kezdesetin qubylys» ekenin atap ótti. Sondyqtan, meniń aıtarym, quqyq qorǵaý organdarynyń jedel is-qımyly men qoǵamnyń bul teraktini qatty aıyptaýy memleketimizdiń turaqtylyǵyn aıqyndady. Meniń oıymsha, bul jaǵdaılar Qazaqstannyń ımıdji men ınvestıtsııalyq klımatyna keri yqpalyn tıgizgen joq. Kerisinshe, jer daýyndaǵy Qazaqstannyń órkenıetti is-áreketi men Aqtóbe teraktisindegi jedel is-qımyl, Qazaqstan halqynyń yntymaǵy men birligi sheteldik áriptesterimiz tarapynan joǵary baǵalandy. Aqtóbedegi jaǵdaı Qazaqstannyń saıası ımıdjine de, ınvestıtsııalyq klımatyna da keri áser etken joq dep aıta alamyn»,-dedi E.Ydyrysov.