Jer bólýdiń monıtorıngilik kartasy jasalady

ASTANA. QazAqparat – Memleket basshysy Qasym-Jomart Toqaev Úkimettiń keńeıtilgen otyrysynda jer bólýdiń monıtorıngilik kartasyn jasaýdy tapsyrdy. Bul karta birinshi kezekte aýyldardaǵy jaıylym tapshylyǵyn joıýy kerek, dep habarlaıdy QazAqparat tilshisi.

«Ózderińiz biletindeı, meniń jańa prezıdenttik ókilettikter sheńberindegi alǵashqy Jarlyǵym aýyldyq aýmaqtardy damytý tujyrymdamasyn ázirleý týraly tapsyrma boldy. Keler jyl aýyl turǵyndarynyń ál-aýqaty men ómir súrý sapasyn arttyrý aıasynda ótedi. Tujyrymdamany ázirleýge jergilikti jerlerdegi sarapshylardy, dıqan, sharýalar men qoǵam belsendilerin barynsha tartý kerek», - dedi Memleket bashysy.

Prezıdent aýyldardy damytý baǵytynda múldem jańa, ári iske jaramdy tásilder qajet ekenin eske saldy.

«Jer – aýyl turǵyndarynyń negizgi tabys kózi. Sonymen qatar, aýyldyq eldi mekenderdiń aınalasyndaǵy jaıylymdardyń tapshylyǵy áli ózekti. Ol kórsetkish shamamen 8,8 mıllıon gektar bolady.

Meniń tapsyrmam boıynsha 5,2 mıllıon gektarǵa jýyq aýylsharýashylyq jeri, negizinen jaıylymdar memleket menshigine qaıtaryldy. Endi Úkimet óńirlerdiń ákimdikterimen birlesip aýyl turǵyndarynyń jaıylymǵa degen qajettiligin qanaǵattandyrý úshin jer bólýdiń monıtorıngilik kartasyn jasaýy kerek», - dedi Qasym-Jomart Toqaev.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.