Jer betiniń árbir júzinshi turǵyny koronavırýs juqtyrǵan
NUR-SULTAN. QazAqparat – Álemde koronavırýsqa shaldyqqandardyń jalpy sany 77.95 mıllıon adamǵa jetti. Bul týraly QazAqparat TASS agenttigine silteme jasap habarlaıdy.
Osylaısha, aýrý juqtyrǵandardyń úlesi ǵalamshardaǵy barlyq turǵynnyń 1 paıyzdan astamyn qurap otyr. BUU-nyń halyq sanaǵyn júrgizý qorynyń esepteýinshe, jyl ortasyndaǵy kórsetkish boıynsha álemde 7,795 mlrd adam ómir súredi.
Іndet juqtyrǵandardyń eń kóp úlesi halyq sany az elderde tirkelgen. Osylaısha, Andorrada turǵyndardyń 9,9 paıyzy (7 633 adam), Lıýksembýrgte – 7,3 paıyz (44 809 adam) vırýs juqtyrǵan. Chernogorııada koronavırýs turǵyndardyń kem degende 7,2 paıyzynan (44 542 adam), al AQSh-ta – 5,6 paıyzynan (18,2 mln astam adam) anyqtaldy. Reseıde bul kórsetkish shamamen 1,9 paıyzdy (2,9 mln adam) qurap otyr.
Álemde koronavırýstyń taralýy báseńdemeı tur. Infektsııa taralýynyń ekinshi tolqyny bastalǵan qyrkúıek aıynda álemde kún saıyn 300 myń adamnan KVI anyqtalyp turǵan. Qazan aıyna qaraı bul kórsetkish táýligine 600 myńǵa deıin ósken. Dúnıejúzilik densaýlyq saqtaý uıymynyń málimetinshe, 20 jeltoqsan kúni jańa rekord – bir táýlik ishinde aýrý juqtyrýdyń 800 myń deregi tirkelgen.
Sonymen birge, aýrý juqtyrǵandardyń jalpy sanynan qaıtys bolǵandar úlesi tómendedi. «Birinshi tolqyn» kezinde bul kórsetkish 6-7 paıyzǵa jetken edi. Osylaısha, álemde vırýs juqtyrýdyń 4 mln oqıǵasy tirkelgen 9 mamyr kúni aýrýǵa shaldyqqandardyń 6,92 paıyzy (276,8 myń adam) qaıtys boldy. Koronavırýstan qaıtys bolǵandardyń sany 1,7 mln adamnan asqan, bul aýrý juqtyrǵandardyń jalpy sanynyń 2,2 paıyzyn qurap otyr.
