Jeri bar adam mindetti túrde mal ustaýy kerek – Qumar Aqsaqalov

Qostanaı oblysynyń ákimi Qumar Aqsaqalov ózi basqarǵan óńirdiń bárinde nege sút taýarly ferma ashýǵa qushtar ekenin túsindirdi, dep habarlaıdy Kazinform.

«Jylyna 10 taýarly sút fermasyn ashý qajet degen máseleni jıi kóteresiz. Siz Soltústik Qazaqstan oblysyn basqarǵan kezde de solaı aıtatynsyz. Sol bastamańyz iske asyp jatyr ma? Qashan ıgiligin kóre alamyz?», –dep surady BAQ ókili Ortalyq kommýnıkatsııalar qyzmetinde ótken brıfıngte.

Ákimniń sózinshe, bul bastama azyq-túlik ımportynyń úlesin azaıtý úshin kóteriledi.

«Ókinishke qaraı, azyq-túliktiń biraz túri shetelden elge ákelinedi. Onyń kóbi ózimizde shyǵarylady. Mysaly, sútten 10 túrli taýar shyǵarady. Biraq mal sharýashylyǵymen aınalysatyn azamattar, ókinishke qaraı, áli azdaý. Sondyqtan, meniń óz pikirim – jeriń bolsa mindetti túrde mal sharýashylyǵymen aınalysýyń kerek. Óıtkeni aýyldy jerlerde jumyssyz júrgen azamattar áli kóp. Al sút taýarly fermalary kóp jumys ornyn ashady. Sút taýarly fermalary ashylsa, jyl saıyn eń keminde 35-40 adam mindetti túrde jumysqa tartylady. Tıimdiligi osynda. Sondaı-aq ol – ata kásibimiz. Sút pen etti tolyǵymen shyǵaryp tursaq, azyq-túlik qaýipsizdigin qamtamasyz etemiz. Sondyqtan keminde 10 ferma salýdy josparlap otyrmyz. Bıyl 7 fermanyń qurylysy bastalyp ketti», – dedi aımaq basshysy.