Jer astynda ótetin fotokórme
ALMATY. 28 shilde. QazAqparat /Ádilet Musahaev/ - Almaty metropolıteni men QR Memlekettik kıno jáne fotoqujat pen dybys jazý murajaı ortalyǵy «Meniń Almatym: ótkeni men búgini jáne bolashaǵy» atty fotokórme uıymdastyrýda.
Kórmeniń basty maqsaty - Almatynyń tarıhyn aıtyp, kórsetý. Sonymen qatar qalanyń qazirgi tynysy men bolashaǵyn jetkizý.
Sharany uıymdastyrýshylar barlyq sheberlerdi, kásibı jáne áýesqoı fotosýretshilerdi, jalpy qolyna fotoapparat ustaı biletinderdi osy kórmege etene qatysýǵa shaqyrady.
Fotokórmege tek jańa sýretter ǵana emes, murajaıdaǵy jáne otbasylyq muraǵatta saqtalǵan fotosýretterde qatystyrylady.
Kórme erekshe jerde ótetin bolady. Barlyq jumystar Almaty metro stansasynda qoıylady.
Sonymen qatar kórme "Meniń Almatym" jáne "Almaty ómir" atty eki atalymda ótedi.
"Meniń Almatym" - atalymynda jumystar súıikti qalanyń ereksheligine arnalady, ıaǵnı Almatyny qaıtalanbas etip, álemdegi eń súıikti qala qylyp turǵan ereksheligi jaıly.
"Almaty ómir" - atalymy qala turǵyndaryna jaǵymdy áser berip turǵan barlyq ereksheligine arnalǵan. Bul bizdi qorshaǵan tabıǵat pen arhıtektýra jáne bizdiń janymyzda júrgen turǵyndar. Sonymen qatar bul atalymda fotoportretter, murajaı men almatylyqtardyń muraǵatynda saqtalǵan fotosýretter qatystyrylady.
Barlyq jumystar elektrondy túrde osy jyldyń tamyz aıynyń 25-ine deıin qabyldanady. Atalǵan sharaǵa qatysyp, ony uıymdastyrýǵa kómektesem deýshiler almatymetro@gmail.com adresine habarlasa alady.
