Jer astyna túsip ketken júk kóligi: Almatylyqtardyń bir bóligi jylýsyz qaldy
ALMATY. QazAqparat - Jer astyna túsip ketken júk kóligi Medeý aýdanynyń turǵyndaryn jylýsyz qaldyrdy, dep habarlaıdy QazAqparat tilshisi.
Aldyn ala málimet boıynsha, saǵat 13.00 shamasynda qum-qıyrshyqtas qospasy tıelgen salmaǵy 27 tonna KamAZ páterlerdiń jylý kamerasy ornalasqan aýmaqqa kirgen.
Júk tıelgen kólik salmaǵyna eseptelmegen betki qabattaǵy tóseme shydas bermeı, opyrylyp tústi. Saldarynan birneshe turǵyn úı jylýsyz qaldy.
«Dıametri 500 mm qubyrǵa zaqym kelýine baılanysty 336 kópqabatty turǵyn úıdi, 86 jeke turǵyn úıdi, 9 densaýlyq saqtaý nysanyn, 10 balabaqsha men 6 bilim nysanyn jylý jelisinen ýaqytsha ajyratýǵa týra keldi» dep habarlady «Almaty jylý jelileri» JShS.
«Almaty jylý jelileri» JShS jóndeý brıgadalary júrgizip jatqan apatty qalpyna keltirý jumysyna 18 maman men mamandandyrylǵan 4 tehnıka jumyldyryldy.
Jylý men ystyq sý búgin saǵat 23.00-ge deıin qaıta qosylady.
Qazirgi ýaqytta Almaty qalasy Medeý aýdanynyń aýmaǵyndaǵy Qazybaev-Nazarbaev-Dostyq-Taımanov kósheleriniń aýmaǵynda ornalasqan turǵyn úıler men basqa ǵımarattar ýaqytsha ystyq sý men jylýdan ajyratyldy.
«Injenerler jylý magıstrali segmentiniń zaqymdanýy basqa tutynýshylarǵa jetkiziletin jylý energııasynyń parametrlerine jáne belgilengen sektorda ornalasqan ǵımarattardaǵy temperatýra rejımine áser etpeıdi» delingen habarlamada.
Biz buǵan deıin Almatyda júk kóligi jer astyna túsip ketkenin habarlaǵan bolatynbyz.
