«Jer amanaty»: Sharýa ata kásip aıasyn keńeıtip jatyr
ORAL. KAZINFORM — «AMANAT» partııasynyń «Jer amanaty» komıssııasy 2022 jyldan beri Batys Qazaqstan oblysynda paıdalanylmaı jatqan jáne zańsyz bólingen aýyl sharýashylyǵy maqsatyndaǵy 387 041 gektar jerdi memleket menshigine qaıtardy.
«AMANAT» partııasy Batys Qazaqstan oblystyq fılıalynyń baspasóz hatshysy Zarına Kaırovanyń aıtýynsha, búginde atalǵan jerler sharýalarǵa úlestirilip, kásipkerler óz isin damytyp jatyr.
Máselen, Jánibek aýdany Uzynkól aýylynda memleket menshigine qaıtarylǵan 351 gektar jer aýdandyq «Jer amanaty» komıssııasynyń usynysy boıynsha «Dáýlen» sharýa qojalyǵyna paıdalanýǵa berildi. ıAǵnı, sharýa Dáýlen Eleýov qolda bar jaıylymdyq jerdiń azdyq etýine baılanysty konkýrsqa qatysyp, osyǵan deıin memleket menshigine qaıtarylǵan jerdi paıdalanýǵa alǵan.
— Ata kásippen aınalysa bastaǵanyma 15 jyldan astam ýaqyt ótti. Etti iri qara, jylqy, qoı sharýashylyǵymen aınalysamyz. Ónimderimizdi aýyl, aýdan jáne qala turǵyndaryna jetkizemiz. Qazir kásip aıasyn keńeıtip, mal basyn kóbeıtip jatyrmyz. Jaıylymdyq jerimiz azdyq etkendikten, konkýrsqa qatysyp, 351 gektar kóleminde jer aldyq. Bul kásip ıelerine berilip jatqan jaqsy múmkindik. Osyndaı qoldaý kórsetilip jatqany úshin shynaıy alǵysymdy bildiremin, — dedi Dáýlen Eleýov.
«AMANAT» partııasy BQO fılıalynyń atqarýshy hatshysy Azamat Safımalıevtiń sózinshe, Memleket basshysynyń tapsyrmasymen 2022 jyly Jer amanaty jobasy aıasynda komıssııalar quryldy. Bul komıssııalar tek oblys ortalyǵynda emes, aýdandyq jerlerde de qarqyndy jumys atqaryp keledi.
— Bul jumystar aıasynda basymdylyqty kásip bastap jatyrǵan jastarǵa bergimiz keledi. Sebebi memlekettik konkýrstarǵa qatysqan kezde kóp jaǵdaıda birneshe jyldan beri osy salada eńbek etip júrgen sharýashylyq ıeleri jeńip jatady, al jas kásip ıelerine jaıylymdyq jerler retinde, egistik alqaptaryna paıdalanyp, kásip bastaýǵa bul úlken múmkindik. 2022 jyldan beri 387 041 gektar jerdi memleket menshigine qaıtarylsa, bıylǵy jyldyń ózinde 30152 ga paıdalanylmaı jatyrǵan jerler qaıtaryldy, — dedi Azamat Safımalıev.
Osyǵan deıin Shyǵys Qazaqstanda 618,1 myń gektarǵa aýyl sharýashylyǵy daqyldary egiletini belgili boldy.