Jer-2017: Qutqarýshylar Tarazdaǵy «jer silkinisinen zardap shekkenderge» attandy
ASTANA. QazAqparat - Búgin Astanadaǵy «Nursultan Nazarbaev» Halyqaralyq áýejaıynda «Jer-2017» respýblıkalyq komandalyq-shtabtyq jattyǵýlar ótti. Osy joly qutqarýshylar shartty túrde Taraz qalasyndaǵy jer silkinisinen zardap shekkenderge attandy. Sol eki arada kınologtar adam izdeıtin ıtterdi úıretýdiń qyr-syryn ashsa, áýejaıdyń qyzmetkerleri apatty jaǵdaıda qonatyn ushaqtar týraly aıtyp berdi, dep xabarlaıdy QazAqparat tilshisi.
Aıta ketken jón, «Jer-2017» respýblıkalyq komandalyq-shtabtyq jattyǵýlar úsh jylda bir ret uıymdastyrylady. Negizgi maqsat - tótenshe jaǵdaılar bolǵan jerge tıisti qyzmetterdi attandyrý. Bıylǵy stsenarıı boıynsha Jambyl oblysy Taraz qalasynda jer silkinisi boldy. Rıxter shkalasyna sáıkes, jerasty dúmpýler 9 ballǵa deıin jetti. Sodan jedel kómek kórsetetin qyzmetter - dárigerler, qutqarýshylar, baılanys mamandary men kınologtar oqıǵa bolǵan jerge attandy.
Erejege sáıkes, ushaqpen attanatyn mamandar aldymen tirkeýden ótýi tıis. Olar da jolaýshylar sııaqty bıletpen tirkeýden ótedi. Alaıda ol bıletterdiń bárin aldyn ala daıyndap qoıady da, tirkeý sharasyn jyldam ótkizedi. Sosyn barlyq qural-jabdyqtardy tekseredi. Qutqarýshylar da tekseristen ótýi kerek. Ony da jyldam jasaıdy. Osydan keıin bárin avtobýsqa otyrǵyzyp, ushaqqa aparyp tastaıdy. Osy joly olar eshqaıda ushqan joq. Jattyǵýdy oıdaǵydaı oryndap bolǵannan keıin fotoǵa tústi de, jumysqa tarady.
Búgingi sharaǵa kınologtar da qatysty. Olar adam izdeıtin ıtterdi qalaısha tańdaıtynyn jáne osy qyzmetke qalaı úıretetinin aıtyp berdi. «Ondaı ıtter óte meıirimdi bolýy qajet. Onsyz adam izdemeıdi. Sondyqtan osy qyzmetke tańdaǵan kezde aldymen barynsha meıirimdi ıtter irikteledi. Sodan biz olardy adamdy izdeýge úıretemiz. Tyǵylmaq oınaımyz. Adamdy tapsa, syı beremiz degen sııaqty. Sosyn bundaı ıtterdiń júıkesi myqty bolýy shart. Sebebi adam izdeý sharasy uzaqqa sozylýy múmkin. Ondaıda ıt alǵan betinen qaıtpaýy kerek», - deıdi kınologtar. Olardyń aıtýynsha, osy ıtterdi daıyndaýǵa biraz ýaqyt ketti. Abyroı bolǵanda, birde-bir ret apat bolǵan jerge shyqqan joq. «Biz ıtterdi úırete bereıik. Biraq apat bolmasyn!», - deıdi mamandar úsh ret túkirip qoıyp.
Búgingi jattyǵýlar kezinde áýejaıdyń órt sóndirýshileri de óz ónerin kórsetti. Olar shartty túrde ushaqtan shyqqan órtti sóndirdi. Atalǵan tapsyrma da oıdaǵydaı oryndaldy. «Áýejaı aımaǵynda ondaı jaǵdaılar boldy ma?», - dep surasaq, qyzmetkerler qudaıǵa shúkirshilik etip, bolmaǵanyn jetkizdi. Alaıda ótken jyly «Qyzylorda-Astana» reısimen apatty jaǵdaıda qonǵan ushaqty eske aldy. Sol kezde áýe kemesiniń artqy shassıi ashyldy. Biraq aldyńǵy dońǵalaǵy shyqpaı qaldy. Sonda órt sóndirýshiler aldymen búkil jolaqqa kóbik shashyp tastady. Odan keıin qańyltyr ispetti alıýmınıı paketterin qoıdy. Ushaq qonǵan kezde aldymen artqy shassıimen júrip keldi de, qańyltyrǵa jaqyndaǵanda tumsyǵyn týra soǵan tiredi. Sóıtip, shana uqsap syrǵanap baryp toqtady.
«Endi, búgingi jattyǵýlar kezinde biz óz daıyndyǵymyzdy taǵy bir márte tekserip alǵandy jón kórdik. Negizi, apatty jaǵdaıda Astana qalasy kez kelgen aımaqqa járdem jibere alady. Azamattyq avıatsııa komıteti arqyly biz qajetti texnıkany, mamandardy jáne taǵy basqa kómekti jetkize alamyz», - deıdi «Nursultan Nazarbaev» Halyqaralyq áýejaıynyń óndiristik qaýipsizdik departamentiniń basshysy Marat Qundaqbaev.
