JEO-lardy jóndeýge 400 mlrd teńge emes, 7-8 trln teńge kerek – Marhabat Jaıymbetov

ASTANA. QazAqparat – Jylý ınfraqurylymyn retke keltirý úshin 400 mlrd teńge emes, 7-8 trln teńge kerek. Májilis depýtaty, 2015-2026 jyldary Qurylys jáne turǵyn úı-kommýnaldyq sharýashylyq komıtetin basqarǵan Marhabat Jaıymbetov Amanat partııasynan saılanǵan máslıhat depýtattarynyń respýblıkalyq forýmynyń kýlýarynda osyndaı derek aıtty, dep habarlaıdy QazAqparat tilshisi.

«Qazaqstanda 14 myń shaqyrym jylý jelisi bar. Sonyń 2 myń shaqyrymy – jekemenshikte. Bul – úlken problema. Jekemenshik qarjy salmaıdy, tek memleket qana salyp otyr. Jekemenshiktegi 2 myń shaqyrym jeliniń 77 paıyzy tozyǵy jetken. Jekemenshik pen kommýnaldyq menshiktegilerdi qosqanda bul kórsetkish 54 paıyz bolyp otyr», - dedi ol.

Depýtat tıisti komıtetti ózi basqarǵan kezde bul salaǵa bıýdjettten qansha qarajat jumsalǵanyn aıtty.

«Kezinde Qurylys jáne turǵyn úı-kommýnaldyq sharýashylyǵy komıtetin alty jyl basqarǵanymdy bilesizder. Júzdegen mıllıard teńge jiberdik. 4-5 jyldyń ishinde 300 mlrd teńgedeı qarjy jiberdik-aý deımin. Ol aqshaǵa tozyǵy jetken jerdiń bárin jamaǵanbyz. Al jekemenshikte qalǵan jylý-elektr ortalyqtarynyń bári problemalyq nysanǵa aınalǵan. Mysaly, 37 JEO bolsa, sonyń 30-yn qaıtadan salý kerek. Qoldanysqa berilgenine 50-60 jyl bolǵan.

Onyń bárin Úkimet keshendi jospar quryp sheshpese, sheshilmeıdi», - deıdi Marhabat Jaıymbetov.

Sondaı-aq ol Indýstrııa jáne ınfraqurylymdyq damý mınıstrliginiń jylý júıesin retteý týraly ustanymyna pikir bildirdi.

«Ondaı keshendi jospardy iske asyrý úshin úlken qarjy kerek. Ondaı qarjyny qaıdan alamyz? Tarıf, halyqaralyq qarjy uıymdary, bıýdjet kózi bar. Tarıfti kóterem degen sóz – halyqtyń qaltasyna túsý. Ony 10-15 paıyz ǵana kóterýge bolady. 400 mlrd teńge tabamyz dep otyr Úkimet. Ol qazirgi JEO-lardyń birqalypty jumys istep turýyna ǵana jetedi. Halyqaralyq qarjy uıymdarynan nesıe tartý – qymbat. 30 paıyzdyq nesıeni eshqandaı bıznes almaıdy. Sonda bıýdjetten qarjylandyrý kózi ǵana qalady.

Bizdiń esebimiz boıynsha jylý-elektr ortalyqtaryn, jelilerdi jóndeý úshin ǵana 7-8 trln teńge kerek. Bul – úlken másele. Sondyqtan biz qaıta-qaıta kúmánmen qarap otyrmyz», - dedi Májilis depýtaty.