JEO qaldyqtary Almaty joldarynyń qurylysyna paıdalanylady
ALMATY. QazAqparat - Almaty qalasynyń ekologııa departamenti men «QazjolǴZI» AQ ókilderi Jylý elektr ortalyǵynda (JEO) jınalatyn kúl-qoj qospalaryn qaıta paıdalaný múmkindigin talqylady, dep habarlaıdy QazAqparat.
Jylý energetıkalyq kesheniniń qaldyqtary – ónerkásiptiń túrli salalarynda, sondaı-aq joldardy salý kezinde qoldanylatyn ámbebap materıal. Topyraqty nyǵyzdaý kezinde kúldi paıdalaný tsementti 20% únemdeýge múmkindik beredi. Máselen, Qazaqstanda 5 jyl ishinde joldardy salý kezinde ónerkásiptik qaldyqtardyń shamamen 8 mln tonnasy paıdalanylǵan.
«Batys Eýropa JEO qaldyqtaryn jol qurylysyna qoldanýda anaǵurlym progressıvti jumystar atqarýda. Frantsııada osy qaldyqtardy «qurǵaqtaı» bólý arqyly paıdalansa, AQSh-ta ushpa kúl men gıdrojoıý kúli qurylysta qoldanylady. Ońtústik Afrıkada ushpa kúl túrli tsement túrlerimen kúsheıtilip, jol qurylysyna arnalǵan topyraqty turaqtandyrǵysh retinde kádege jaratylady eken.
Almatylyq ekologtar men jolshylar kúl-qoj qaldyqtaryn qaıta paıdalaný múmkindikteri, zerthanalyq synamalar men jol salý kezinde qospanyń tıisti quramyn tańdaýdyń qajettigi taqyryptaryn talqylady. Joba kúl úıindileriniń kólemin azaıtyp, aımaqtaǵy ekologııalyq jaǵdaıdy jaqsartýǵa yqpal etpek», - delingen Indýstrııa jáne ınfraqurylymdyq damý mınıstrliginiń málimetinde.
Eske salaıyq, aldaǵy 5 jylda respýblıkalyq mańyzy bar joldardy salý jáne qaıta jańartý kezinde óndiristik qaldyqtardyń 5,3 mln tonnasy paıdalynylatyny josparlanýda.
