JEO-da bolǵan apatqa baılanysty Ekibastuzda 90 úı jaryqsyz qalǵan

ASTANA. QazAqparat – Ekibastuz JEO-synda bolǵan apatqa baılanysty qalanyń elektr energııasy jelilerine 2 ese kúsh túsip, keıbir úıler jaryqtan ajyratylǵan. Bul týraly Pavlodar oblysynyń ákimi Asaıyn Baıhanovtyń qatysýymen ótken jedel shtabtyń otyrysynda málim boldy, dep habarlaıdy QazAqparat tilshisi.

«Keshe elektr energııasy jelileriniń júktemesi 70 megavatt boldy. Bul – qalypty jaǵdaıdan 2 ese joǵary. 18 aqpanda jylý parametrleriniń tómendeýine baılanysty turǵyndar ózderiniń páterlerinde jylytý qurylǵylaryn qosty. Júkteme aýyr bolǵandyqtan, ýaqytsha 30 kópqabatty turǵyn úı men 60 jeke úı jaryqtan ajyratyldy. Sebebi, jeliden aqaýlar shyqty. Qazir bul baǵyttaǵy jumystar aıaqtaldy. Tek bir úıde jaryq joq. Baspanaǵa baryp turǵan kabel aýystyrylyp jatyr», - dep málim etti «Ekibastuzenergo» JShS ókili jedel shtabtyń otyrysynda.

JEO-daǵy apatqa baılanysty ótken jıynda Pavlodar oblysynyń ákimi Asaıyn Baıhanov qazir úıler men áleýmettik nysandardaǵy jylý parametrlerin kóterýdi tapsyrdy. Sonymen qatar, búgin keshke stantsııadaǵy taǵy bir qazandyq búgin iske qosylmaq.