JEO-3-ti paıdalanýǵa berý arqyly elorda ekologııasy jaqsarady
ASTANA. 7 aqpan. QazAqparat - Astanada JEO-3 qurylysyn 2018 jyly aıaqtaý josparlanýda. Joba kezeń-kezeńimen eki mezgilde júzege asyrylady. Atap aıtqanda: birinshi kezeń - 2010-2015 jyldary jáne ekinshi kezeń - 2014-2018 jyldary. Bul týraly Saryarqa aýdany ákimdiginen málim etti.
Elordanyń resmı saıtynyń jazýynsha, Astananyń qarqyndy damýyn eskere otyryp, qalany elektr qýatymen qamtý jyldan-jylǵa ózekti máselege aınalýda. Jańa jylý elektr ortalyǵyn iske qosý, mamandardyń aıtýynsha, kópqabatty turǵyn úılerdegi jekelegen jylý berý kózderiniń qajettiligin joıyp, elordanyń energoresýrstarǵa degen aýqymdy suranysyn qanaǵattandyrady, qalany energo jáne jylýmen qamtýdyń senimdiligin arttyrady.
Taǵy bir mańyzdysy, JEO-3 qurylysynyń iske qosylýy JEO-1-di toqtatyp, qalanyń ekologııalyq jaǵdaıyn jaqsartýǵa aıtarlyqtaı septigin tıgizedi. JEO-1 1961 jyldan beri jumys istep keledi. Qazirgi ýaqytta ol qorshaǵan ortany qorǵaý talaptaryna tolyq kólemde jaýap bere almaıdy.
Degenmen, 2012 jyly qalalyq JEO-1 jáne JEO-2-ge aýaǵa shyǵaratyn zııandy zattardyń sanyn turaqtandyrý úshin № 4 qazandyq qurylǵysyna tor kerneý ornatylǵan bolatyn. Ol azot qyshqylyn aýaǵa shyǵarýdy 550 mg tekshe metrge deıin azaıtýǵa múmkindik berdi.
