«JEO-2» gazǵa aýyssa, Almatynyń aýasy 30 esege tazarady
ASTANA. QazAqparat - Ońtústik astanadaǵy «Almaty Jylýelektr ortalyǵynyń» tabıǵı gazǵa ótýi aýaǵa taralatyn zııandy zattardyń mólsherin 30 ese azaıtady. Bul týraly búgin baspasóz máslıhatynda energetıkamınıstrliginiń ekologııalyq retteý jáne baqylaý komıtetiniń tóraǵasy Sábıt Nurlybaevmálim etti, dep habarlaıdy «QazAqparat» HAA tilshisi.
«Almaty qalalyq tabıǵı resýrstardy jáne tabıǵatty paıdalanýdy retteý basqarmasynyń málimetteri boıynsha, 2016 jyly Almatyda jalpy zııandy zattar shyǵaryndysy 285 myń tonnany quraǵan. Onyń ishinde «AlES» AQ nysandarynyń úlesine 11 paıyzy (31,59 myń tonna) tıesili. Sondyqtan, kásiporyndy gazǵa aýystyrý aýaǵa bólingen zııandy zattardyń mólsherin aıtarlyqtaı azaıtady. Biz aldyn ala esep jasadyq. Esepteýimiz boıynsha, kómirden gazǵa aýystyrý aýaǵa zııandy zattardyń taralýyn 30 esege azaıtady. Sondyqtan, biz Memleket basshysynyń JEO-2 kásipornyn gazǵa aýystyrýdy tolyǵymen qoldaımyz», - dedi Sábıt Nurlybaev.
Osylaısha, «Almaty JEO-2» kásipornyn gazǵa almastyrý,sondaı-aq jeke sektordy gazǵa 100 paıyz almastyrý qalanyń aýasyn jaqsartýǵa jáne JEO-2 bóletin zııandy zattardyń mólsherin 30 myń tonnadan 1,0 myń tonnaǵa deıin tómendetýge múmkindik bermek.
Eske sala ketsek, Memleket basshysy 2020 jylǵa deıin Almatydaǵy JEO-2-ni gazǵa kóshirý jóninde tapsyrma bergen bolatyn. Sondaı-aq, Prezıdent Almaty qalasynyń ákimdigine qoqys qaldyqtaryn jınaý, qorytý, joıý tsıkliniń túıtkildi máselelerin sheshýdi tapsyrdy.
