Jeńis kúni: otandyq desantshylar paradqa qatysý úshin Máskeýge bardy
ASTANA. KAZINFORM — Paradtyń eseptobynda barlyǵy 80 adam bar, dep habarlaıdy Qorǵanys mınıstrliginiń baspasóz qyzmeti.
9 mamyrda Máskeýdegi paradqa Qazaqstan atynan Desanttyq-shabýyldaý áskerleri Keńes Odaǵynyń Batyry general-maıor Ivan Panfılov atyndaǵy 37 desanttyq-shabýyldaý brıgadasynyń áskerı qyzmetshilerinen quralǵan paradtyq eseptop shyǵady.
1941 jyly Volokolamsk baǵytynda Máskeýdi erlikpen qorǵaǵan 316 atqyshtar dıvızııasynyń quramynda Panfılov jaýyngerleri boldy. Barlyq jeke quramnyń shaıqastarda kórsetken erligi, tabandylyǵy, batyldyǵy men janqııarlyǵy úshin dıvızııa «QYZYL TÝ» ordenimen marapattalyp, «GVARDIıALYQ» degen ataq berildi.
Chkalovskıı áskerı áýeaılaǵynda qazaqstandyq desantshylardy Reseı Federatsııasyndaǵy Qazaqstan Qorǵanys mınıstrliginiń qorǵanys máseleleri jónindegi attashesi general-leıtenant Talǵat Qoıbaqov qarsy aldy. Ol jaýyngerlerge tarıhı mańyzy bar sharada eldiń atynan abyroımen sap túzep ótýine tilektestik bildirdi.
— Saltanatty lekti 37-shi desanttyq-shabýyldaý brıgadasynyń komandıri, ekinshi dárejeli «Aıbyn» ordenimen jáne «Jaýyngerlik erligi úshin» medalimen marapattalǵan polkovnık Almas Tólegenov basqarady. Paradtyń eseptobynda barlyǵy 80 adam bar. Onyń ishinde 2 ofıtser, 28 kelisimshart boıynsha áskerı qyzmetshi jáne 40 merzimdi qyzmettiń sarbazy, — delingen mınıstrlik taratqan aqparatta.
37-shi desanttyq-shabýyldaý brıgadasy Ujymdyq qaýipsizdik týraly shart uıymy Jedel den qoıý ujymdyq kúshteriniń quramyna kiredi. Bul áskerı qurylym jaýyngerlik turǵyda árkez daıyn. Beıbit ýaqytta ol tótenshe jaǵdaı rejıminde qoǵamdyq qaýipsizdikti qamtamasyz etý, memlekettik shekarany kúsheıtý, asa mańyzdy obektilerdi kúzetý jáne qorǵaý, bólimshelerdi terrorızmge qarsy operatsııalarda, tabıǵı jáne tehnogendik sıpattaǵy jaǵdaılarda qoldaný mindetterin oryndaıdy.
Osyǵan deıin Shyǵys Qazaqstanda Jeńis kúnine oraı 100-ge jýyq shara uıymdastyrylatyny belgili boldy.