Jeńistiń 80 jyldyǵyna oraı el aýmaǵynda eki myńdaı is-shara ótedi
ASTANA. KAZINFORM — Elimizde ekinshi dúnıejúzilik soǵys jeńisiniń 80 jyldyǵyn atap ótýge arnalǵan ulttyq is-sharalar jospary aıasynda jyl boıy shamamen 2000 is-shara ótedi. Merekelik baǵdarlama týraly tolyǵyraq Mádenıet jáne aqparat mınıstri Aıda Balaeva aıtyp berdi.
— Memleket basshysy 2025 jyldyń 26 naýryzda «Ekinshi dúnıejúzilik soǵys Jeńisine 80 jyl» mereıtoılyq medalin shyǵarý týraly Jarlyqqa qol qoıdy. Merekeni atap ótýge arnalǵan logotıp pen brendbýk ázirlenip, bekitildi. Osy aıda memlekettik arhıvte «Qazaqstan: bári de jeńis úshin, bári de maıdan úshin!» atty kórme jáne «Ekinshi dúnıejúzilik soǵystyń jańa betteri» ǵylymı-praktıkalyq konferentsııasy ótedi, — dedi Aıda Balaeva elordada ótken ardagerler keńesiniń plenýmynda.
Sondaı-aq mınıstr «Qazaqfılm» kınostýdııasy óńirlik kınoteatrlarda kórsetilimder uıymdastyrý úshin 19 ulttyq fılmniń tizimin jasaǵanyn aıtty.
— Mınıstrlik Jeńistiń 80 jyldyq mereıtoıyn nasıhattaý maqsatynda medıa-jospar aıasynda aqparattyq jumysty belsendi istep jatyr. «Qazaqstan» telearnasynda 27 naýryzdan bastap «Erjúrek esimder» jobasy kórermenderge jol tartty. Kún saıyn Ekinshi dúnıejúzilik soǵys ardagerleri týraly eki beınerolık kórsetiledi. Jalpy sany — 80 rolık, qazir 50 rolık daıyn. Aqparattyq qoldaýdy júzege asyrýda barlyq respýblıkalyq jáne óńirlik BAQ, ınternet-resýrstar men áleýmettik jeliler tartylyp jatyr, — deıdi ol.
Aıta ketsek, Uly Jeńistiń 80 jyldyǵyna oraı ótetin áskerı sherý barlyq respýblıkalyq telearna men ortalyq alańdardaǵy LED ekrandardan tikeleı kórsetiledi.
Búgin elordada respýblıkalyq ardagerler uıymy keńesiniń kezekti plenýmy ótti. Oǵan elimizdiń barlyq óńirinen ardagerler keńesiniń tóraǵalary qatysty.