Jeńistiń 80 jyldyǵyna: Qazaqstandyq áskerı 80 shaqyrym marafon júgirip shyqty
ASTANA. KAZINFORM — Qorǵanys mınıstrliginiń áskerı qyzmetshisi Tımýr Erjanov Uly Otan soǵysyndaǵy Jeńistiń 80 jyldyǵyna oraı 80 shaqyrym marafon júgirip shyqty. Bul júgiristi maıdanda qaza tapqan batyrlar men kózi tiri ardagerlerge arnap otyr.
Tımýr Erjanov — «Astana» óńirlik qolbasshylyǵy 31775 áskerı bólimi 1-shi motoatqyshtar rotasynyń starshınasy, 3-synypty serjant. Ol Qaraǵandy oblysy Buqar Jyraý aýdany Sheshenqara kentinen óz áskerı bólimine deıin júgirip kelgen.
7 saǵat 21 mınýt 11 sekýndqa sozylǵan júgiriste marafonshyǵa ár 10 shaqyrym saıyn áriptesteri qoldaý kórsetip otyrdy. Áıtse de Tımýr Erjanov negizgi qashyqtyqty tek óz kúshimen eńserip shyqqan.
— Men uzaq ýaqyttan beri júgirýmen aınalysamyn, marafondarǵa da jıi qatysyp turamyn. Bıyl Jeńistiń 80 jyldyǵyna oraı sımvoldyq qashyqtyqty júgirýge bel býdym. Sol arqyly maıdanda qaza tapqandar men ardagerlerge qurmet kórsetkim keldi. Bólim basshylyǵyna jáne komandaǵa qoldaýy úshin rahmet aıtamyn, — dedi T. Erjanov.
Áskerı qyzmetshi máre syzyǵyna aman-esen, sergek kúıde jetken jáne 80 shaqyrym ózine asa kúsh túsirmegenin aıtty. Jaqyn arada Erjan Jańaarqa aýylynan Qaraǵandyǵa deıin 200 shaqyrym júgirýdi josparlap otyr.
Marafonshyny qoldaýǵa onyń týystary da keldi. Tımýr jubaıy Janarmen birge Aıarý, Ámına jáne Rasýl esimdi úsh bala tárbıelep otyr.
Aıta keteıik, Jeńistiń 80 jyldyǵyna oraı el aýmaǵynda eki myńdaı is-shara ótedi.