Jeńistiń 80 jyldyǵyna arnalǵan áskerı sherý: Qorǵanys mınıstrligi málimdeme jasady

ASTANA. KAZINFORM – 13 naýryzdan bastap áýe jáne kólik qatynasyna jekelegen ýchaskelerde ýaqytsha shekteý engizilýi múmkin. Bul týraly Qorǵanys mınıstrligi habarlaıdy.

- Uly Otan soǵysyndaǵy Jeńistiń 80 jyldyǵyna arnalǵan Astana qalasynda ótetin áskerı paradqa daıyndyq sharalaryna baılanysty 13 naýryzdan bastap jeke quramdy tasymaldaý jáne áskerı tehnıkanyń temirjol kóligimen de, óz júrisimen qozǵalysy bastalady dep josparlanyp otyr, - delingen habarlamada.

Osyǵan oraı elimizdiń keıbir aımaqtaryndaǵy joldardyń jekelegen ýchaskelerinde jol qozǵalysyna ýaqytsha shekteý engizilýi múmkin.

- Sondaı-aq 2025 jylǵy 22 sáýir men 7 mamyr aralyǵynda áskerı avıatsııanyń jattyǵý ushýlaryn júrgizý úshin Astana qalasynda áýe keńistigin paıdalanýǵa qysqa merzimdi shekteýler qoıylady. Osyǵan baılanysty áýe reısteriniń kestesine de ózgerister engizilýi múmkin. Biz azamattarǵa reıster týraly aqparatty aldyn ala naqtylaýdy usynamyz, - deıdi vedomstvodan.

Sonymen qatar mınıstrlik engizilgen shekteýlerge túsinistikpen qaraýdy, jalǵan aqparat taratpaı, tek resmı derekkózderge júginýdi surap otyr.

Aıta keteıik, bıyl Uly Jeńiske 80 jyl tolady. 

Sondaı-aq bıyl Ekinshi dúnıejúzilik soǵys ardagerlerine Jeńistiń 80 jyldyǵy medali beriledi.