Jeńistiń 80 jyldyǵyn toılaýdyń birlesken is-sharalar jospary bekitilýi múmkin

ASTANA. KAZINFORM – Ekinshi dúnıejúzilik soǵystaǵy jeńistiń 80 jyldyǵyn Ujymdyq Qaýipsizdik týraly shart uıymy aıasynda atap ótýdiń jospary bekitilýi múmkin. Bul týraly Memleket basshysy Qasym-Jomart Toqaev Ujymdyq qaýipsizdik keńesiniń keńeıtilgen otyrysynda aıtty. 

«Ardagerlerdiń qaharmandyǵy, tyl ardagerleriniń eńbektegi eren erligi bizdiń jadymyzda máńgi qalady. Olar bárimiz úshin sheksiz maqtanysh pen syılastyqtyń sarqylmas kózi. Ataýly kúnniń qarsańynda UQShU Ujymdyq Qaýipsizdik keńesiniń málimdemesin qabyldap, aıtýly datany merekeleý jónindegi is-sharalar josparyn bekitý mańyzdy dep sanaımyz. Búgin aıtylǵan usynystar men bastamalar uıymǵa qatysýshy memleketterdiń múddesi úshin iske asyrylatynyna senimdimin», - dedi Qasym-Jomart Toqaev.

Memleket basshysy Qazaqstan uıymǵa tóraǵalyq etken kezde 60-qa jýyq mańyzdy shara uıymdastyrylǵanyn atap ótti. 

«Qurmetti áriptester, Qazaqstannyń UQShU tóraǵalyǵy aıasynda yntymaqtastyqtyń jarǵylyq baǵyttary boıynsha 60-qa jýyq is-shara ótkizildi. Biz seriktestermen birge kelisilgen tásilderdi halyqaralyq arenada ilgeriletý baǵytynda jumys istedik», - dedi Prezıdent.