Jeńistiń 80 jyldyǵy: parad alańyna ataqty «Katıýsha» men T-34 tanki shyqty
ASTANA. KAZINFORM — Elordadaǵy áskerı parad kezinde parad alańyna ataqty «Katıýsha» men T-34 tanki shyqty.
Táýelsizdik jyldarynda Qazaqstan armııasy qalyptasý men damýdyń kúrdeli kezeńinen ótti. Qazirgi tańda Qazaqstan Qarýly kúshteriniń jańa kelbeti qalyptasty. Kásibıligi joǵary, mobıldi ári zamanaýı qarý-jaraqpen jáne tehnıkamen jabdyqtalǵan ulttyq armııa quryldy. Qazaqstan Qarýly Kúshteriniń Joǵarǵy Bas qolbasshysynyń buıryǵyna sáıkes, ásker zamanaýı qarý-jaraqpen jáne tehnıkamen qamtamasyz etilgen.
Atap aıtqanda, búgingi parad kezinde áskerı tehnıka úlgileri, sondaı-aq Ekinshi Dúnıejúzilik soǵystaǵy Uly Jeńis jolynda armııanyń negizgi qarýy bolǵan tehnıka úlgileri kópshilik nazaryna usynyldy.
Alańnan soǵys kezinde eń kóp shyǵarylǵan ári asa tanymal bolǵan T-34 tanki men tanymal BM-13 («Katıýsha») reaktıvti artılerrııa mashınasy júrip ótti. «T-34» tanki — Ekinshi dúnıejúzilik soǵysynyń ańyzy. Qarapaıym ári senimdi, urysqa kirgen alǵashqy sátten bastap ol teńdesi joq sapasyn kórsetti. Soǵys jyldarynda 30 myńnan astam «T-34» tanki shyǵaryldy. Bul jaýyngerlik qasıetteri boıynsha fashıstik Germanııanyń ortasha tankterinen asyp túsetin tank boldy. T-34 Uly Otan soǵysynyń birinshi kúninen bastap sońǵy kúnine deıin abyroımen ótip, Jeńistiń sımvolyna aınaldy. Al reaktıvti artıllerııasynyń «BM-13» jaýyngerlik mashınasy «Katıýsha» dep ataldy. Onyń utqyrlyǵy men óristetý jyldamdyǵy jedel artıllerııalyq qoldaýdy qamtamasyz etti. Bul «Katıýshany» maıdan dalasyndaǵy taptyrmas qarý etti.
Reaktıvti júıe tek tehnıkalyq jetistikke ǵana emes, sonymen qatar sarbazdardyń jaýyngerlik rýhynyń sımvolyna aınaldy. «Katıýsha» jeńis tarıhynda aıtarlyqtaı iz qaldyrdy.
Odan soń sol kezeńdegi ZIS-2 zeńbirekteri men M-30 gaýbıtsalary kórsetildi. Bir kezderi ZIS-2 zeńbiregi tankke qarsy eń qýatty qarý retinde tanyldy. Soǵys kezinde ol «Tıgr» aýyr tankterine qarsy qoldanyldy.
«ZıL-157» tehnıkasyna ornatylǵan 122 mm kalıbrli «M-30» shynjyr tabandy artıllerııalyq qondyrǵy da parad kezinde júrip ótti. 1930 jyldary jasalǵan «M-30» Keńes Armııasynyń jeńisinde mańyzdy ról atqardy. Sol jyldary «M-30» 14 shaqyrymǵa deıin atys júrgize aldy, bul jaýdyń bekinisti pozıtsııalaryna soqqy berýge múmkindik berip, qarsy shabýyldarǵa múmkindikter ashty.
Budan buryn habarlanǵandaı, elordadaǵy «Qazaq Eli» alańynda Memleket basshysy — Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad ótip jatyr.