Jeńistiń 80 jyldyǵy: Qaharman aqyn Abdolla Jumaǵalıev týraly derekti fılm túsirilmek
ORAL. KAZINFORM — Batys Qazaqstan oblysynda Jeńistiń 80 jyldyǵy qarsańynda qaharman aqyn Abdolla Jumaǵalıevtiń (1915-1941) 110 jyldyǵyna oraı mereıtoılyq is-sharalar uıymdastyrylyp otyr.
Syrym aýdany ákiminiń orynbasary Serik Toqmambetov málim etkendeı, aldymen aqyn óleńderin jatqa oqýdan oblystyq «Abdolla oqýlary» ótkizildi.
Aldaǵy ýaqytta Abdolla oqýlarynyń aıasyn keńeıtý kózdelýde. Sondaı-aq Syrym aýdanynda ótetin «Jeńisti jaqyndatqandar jáne eskerilmegen erlikter» taqyrybynda oblystyq ǵylymı-tájirıbelik konferentsııada ǵalymdar men tarıhshy ustazdar bas qosatyn bolady.
— Ekinshi dúnıejúzilik soǵysta erlikpen qaza tapqan Abdolla Jumaǵalıev ómiriniń sońǵy sátteri týraly derekter áli kúnge belgisiz bolyp qalyp otyr. Osyny anyqtaý maqsatynda Jympıty — Oral — Máskeý baǵytynda alǵash ret ekspedıtsııa uıymdastyrylǵaly otyr. Sonyń qorytyndysy boıynsha derekti fılm jaryqqa shyǵatyn bolady, — dedi S. Toqmambetov.
Syrym Datuly atyndaǵy ólketaný mýzeıiniń meńgerýshisi Aınagúl Oıshybaıdyń naqtylaýynsha, aldymen aqynnyń týǵan jeri — Bylqyldaq, sosyn Oralda pedagogıkalyq ınstıtýt (qazir ýnıversıtet), Jaıyq pen Shaǵannyń boıy, áskerge attanǵan jeri — Almaty qalasynan kadrlar túsiriledi. Sodan keıin ekspedıtsııa 28 sáýir kúni attanyp, Máskeýden 108 shaqyrym qashyqtyqta ornalasqan Volokolamsk qalalyq okrýgine qarasty Novınkı aýylynda bolyp, 2 mamyrda elge oralmaqshy.
Abdolla Jumaǵalıevtiń 1941 jyly 26 qazanda Novınkıdegi aǵash úıdiń ishinde sońǵy demi qalǵansha jaýmen shaıqasyp, ot ishinde janyp ketkeni belgili. Atalmysh úı saqtalmaǵan. Ornyna basqa úı salynǵan.
Mýzeı meńgerýshisiniń aıtýynsha, Novınkıdegi úıdiń ornyn volokolamskilik izdeýshi Sergeı Bobınov kórsetpekshi.
Reseıdiń «Pamıat naroda» saıtynda Abdolla Jumaǵalıev týraly qysqa ǵana málimet berilgen. Týǵan jyly, áskerge qaıdan shaqyrylǵany, ákesi Jumaǵalı Kóshekov, balasy men áıeli joq ekendigi jazylǵan. Biraq qaza tapqan ýaqyty 1944 jyl dep kórsetilgen.
— Tek bir tapqanymyz, dalalyq poshtasynyń nómiri bar. Osyny reseılik izdeýshilerge berdik. Sonymen qatar Reseı Qorǵanys mınıstrliginiń Podolskidegi ortalyq arhıvine arnaıy hat jazyldy. Abdollanyń sońǵy shaıqasy, qalaı qaza tapqany týraly málimetterdi anyqtasaq, esimin Volokolamskidegi qurmet kitabyna engizý oıda bar, — dedi Kazinform tilshisine A.Oıshybaı.
Eske sala keteıik, budan buryn Uly Jeńiske 70 jyl tolýyna oraı BQO-da qaharman aqyn Abdollanyń 100 jyldyǵyna arnalǵan sharalar jalǵasyp jatqanyn jazǵan bolatynbyz.