Jeńiske jetetinime senimdi boldym — 12 jasar shabandoz bala

ASTANA. KAZINFORM — Dúnıejúzilik kóshpendileri oıyny aıasynda ótken top báıgede Holıboı atty tulparymen birinshi kelgen Serjan Baqtybaı jarystan keıin áserin bólisti.

«Josparym attardyń aldyńǵy leginde shaýyp otyrý boldy. Ekinshi kelgen Zymyran myqty júırik, tý syrtymnan tynysyn sezip otyrdym. Sońǵy 500 metr qalǵanda qamshy basyp, birinshi keldim. 7 jasymnan báıgege qatysyp kelemin. Kóńil-kúıim keremet», — deıdi shabanboz.

Almaty oblysynyń Aqterek aýylynda dúnıege kelgen Serjan Baqtybaı buǵan deıin alaman báıgege qatysyp, Haval kóligin utyp alǵan edi

«Holıboı márege deıin tyń jetti, sharshaǵany baıqalǵan joq. Jeńiske jetetinime senimdi boldym», — dedi ol.

Holıboı bapkeri Medet Erálim tulparynyń shetelden satyp alynǵan taza qandy aǵylshyn jylqysy ekenin aıtady.

«Shetelden Reseıge, odan bizge kelgen at. Germanııada, Reseıde jarystarǵa qatysqan. Shetelde berilgen aty — Holıboı. Satyp alǵannan keıin ózgertýge de bolar edi. Jaqynda ǵana satyp aldyq. Bul — elimizde birinshi qatysyp otyrǵan jarysy. Baǵasy qupııa, óte qymbat sáıgúlik. Aldaǵy ýaqytty ushqyr báıgege, toptyq, alaman báıgege qosý oıymyzda bar. Bul — naǵyz ıppodrom aty. Ózderińiz kórgen Zymyran osy kúnge deıin aldyna qara salmaı kelgen edi. Búgin bizge buıyrdy», — dedi at bapkeri Medet Erálim. 

Sondaı-aq ol shabandoz balaǵa iPhone16 satyp áperýge ýáde etti.

«Keshe túnde atqoraǵa kelip, jeńiske jetseń iPhone 16 alyp beremin dep ýáde etkenmin. Túnimen ýaıymdap shyǵypty. Alyp beremin», — dedi ol.