Jeńiske – 80 jyl: Ulttyq ulan jaýyngerleriniń saltanatty kıimderi ázirlenip jatyr
ASTANA. KAZINFORM — Ulttyq ulanynda Jeńis kúnine arnalǵan saltanatty áskerı sherýge qarqyndy daıyndyq júrip jatyr. Merekelik shara aıasynda quqyqtyq-tártip áskeriniń tigin sheberhanalarynda jaýyngerlerdiń áskerı kıim úlgileri kásibı deńgeıde ázirlenip jatyr.
Kıimder arnaıy sapaly matadan tigilip, áskerı talaptarǵa saı tigilip jatyr. Bul kıimder merekelik sharanyń sán-saltanatyn arttyryp qana qoımaı, sap túzeıtin sarbazdardyń syrt kelbetine salmaqty reńk beredi. Tigin tsehy mamandarynyń aıtýynsha, árbir forma úlgisi naqty ólshemder boıynsha, jaýyngerdiń dene bitimine saı ázirlenip, maksımaldy yńǵaılylyq pen jınaqylyqty qamtamasyz etedi.
— Áskerı forma – bul jaýyngerdiń ishki tártibin, rýhyn, maqtanysh sezimin beıneleıtin mańyzdy bólik. Sondyqtan biz kıimniń árbir tigisine, matanyń sapasyna, bólshekterdiń úılesimine úlken mán beremiz, – deıdi tigin tsehynyń sheberi qatardaǵy Gúlnur Áben.
Kıim úlgilerinde ulttyq naqyshtaǵy elementter kózge aıryqsha túsedi. Bul — Ulttyq ulan áskerı qyzmetshileriniń dástúr men zamanaýı kelbetti úılestire otyryp, Jeńis kúniniń rýhyn asqaqtata túsýine baǵyttalǵan sheshim.
Aıta keteıik, Jeńis kúnine arnalǵan sherýge Ulttyq ulannan 400-den astam áskerıler qatysady. Onyń ishinde patrýldik-bekettik qyzmettiń áskerı qyzmetshilerinen jáne «Búrkit» arnaıy maqsattaǵy bólimshesiniń jaýyngerlerinen turatyn eki eseptik top sap túzep ótedi. Sondaı-aq, Qazaqstannyń Kúsh qurylymdarynyń qurama orkestriniń sapyndaǵy quqyqtyq tártip áskerleriniń 30 áskerı qyzmetshisi Jeńis sherýin mýzykamen súıemeldeıdi.
Al qazirgi ýaqytta respýblıka boıynsha Ulttyq ulanda 30-ǵa jýyq tigin sheberhanasy bar. Onda 40-tan astam áskerı qyzmetshi qyzmet etedi.
Aıta ketelik bes óńirde soǵys ardagerlerine tólem jasalǵan edi.