Jeńiske – 80 jyl: áskerı sherý barlyq telearna men LED ekrandardan tikeleı kórsetiledi

ASTANA. KAZINFORM – Ekinshi dúnıejúzilik soǵys jeńisiniń 80 jyldyǵyna arnalǵan elordada ótetin áskerı sherý barlyq respýblıkalyq telearnadan tikeleı efırde kórsetiledi. 

Mádenıet jáne aqparat mınıstri Aıda Balaevanyń aıtýynsha, áskerı sherýden bir kún buryn (6 mamyr) Jeńis merekesi men Otan qorǵaýshylar kúnine arnalǵan saltanatty kontsert ótedi.

- 7 mamyrda Astanadaǵy «Qazaq eli» monýmentiniń alańynda Qazaqstan Respýblıkasynyń Qarýly Kúshteri, Ulttyq qaýipsizdik komıtetiniń shekara qyzmeti, Ulttyq gvardııa, Tótenshe jaǵdaılar mınıstrligi jáne Memlekettik kúzet qyzmeti bólimsheleriniń qatysýymen áskerı parad uıymdastyrylady. Merekelik sharalardy keńinen nasıhattaý maqsatynda paradtyń tikeleı efıri respýblıkanyń barlyq ortalyq telearnalarynda kórsetiledi, - dedi Aıda Balaeva elordada ótken ardagerler keńesiniń plenýmynda.

Sondaı-aq barlyq óńir men Astana qalasynyń ortalyq alańdarynda arnaıy LED ekrandar ornatylyp, qazaqstandyqtar áskerı sherýdi naqty ýaqyt rejıminde tamashalaı alady.

Bıyl Uly Jeńiske 80 jyl tolady. 

Aıta keteıik, 7 mamyr kúni elordada Jeńistiń 80 jyldyǵyna arnalǵan áskerı sherý ótedi. Osy oraıda Qorǵanys mınıstrligi málimdeme jasaǵan edi.

Naýryzda Prezıdent Teleradıokesheni soǵys ardageri Jaqan Seısebaevty ǵasyr jasymen quttyqtady.