Jeńiske 80 jyl: Almaty aspanynda soǵys batyrlarynyń beınesi kórsetiledi
ALMATY. KAZINFORM — 9 mamyr kúni saǵat 21:00–de Abaı alańynda Jeńistiń 80 jyldyǵyna oraı almatylyqtar men qala qonaqtaryna erekshe jaryq shoýy usynylady — 500 dron qatysatyn aýqymdy kórinis ótedi.
Almaty ákimdiginen atap ótkendeı, kórsetilimniń basty ereksheligi — soǵys jyldarynda Qazaqstandy dańqqa bólegen batyrlardyń beınesi kórsetiledi.
— Almaty aspanynda aty ańyzǵa aınalǵan qaharman qyzdar Mánshúk Mámetova men Álııa Moldaǵulova, sondaı-aq, Baýyrjan Momyshulynyń beınesi jaryq arqyly jandanady. Zamanaýı tehnologııalar men jaryq anımatsııasynyń kómegimen olardyń erligi men rýhyn jetkizetin kórinister arqyly elge tanystyrylady, — dep habarlady ákimdikten.
Dron-shoý barysynda eske alýdyń belgisi retinde tyrnalar da kórsetiledi. Al shoýdyń sońynda qazaqtyń oıý-órnegi aıasynda «Jeńis kúni qutty bolsyn» degen jazý paıda bolady.
— Bul zamanaýı vızýaldy shoý — batyrlarǵa taǵzym ǵana emes, soǵys týraly jańa, qoljetimdi, áserli ári este qalarlyq baıandaý túri. Ol tarıhı jadymyzdy saqtaý men keler urpaqqa jetkizýdiń mańyzdylyǵyn eske salady. Іs-shara demeýshilerdiń qoldaýymen barlyq qaýipsizdik talap saqtala otyryp uıymdastyrylady, — dep atap ótti ákimdikten.
Uıymdastyrýshylar dron-shoýdy tamashalaýǵa arnalǵan birneshe yńǵaıly alań daıyndady. Basty oryndar: Abaı alańy, «Qazaqstan» qonaq úıiniń mańy, Caspian University janyndaǵy oryn jáne Abaı dańǵyly boıyndaǵy aýmaqtar — Nazarbaev dańǵylynan Dostyq dańǵylyna deıin.
Osyǵan baılanysty 9 mamyr kúni saǵat 20:30–dan 21:30–ǵa deıin qala ortalyǵynda avtokólik qozǵalysyna ýaqytsha shekteý engiziledi.
Abaı dańǵylynyń Nazarbaev dańǵylynan Dostyq dańǵylyna deıingi bóligi, sondaı-aq, Dostyq dańǵylynyń Qurmanǵazy kóshesinen Sátbaev kóshesine deıingi aralyǵynda jol jabylady.
Almaty qalasynyń ákimdigi qala turǵyndary men qonaqtaryn baǵytty aldyn ala josparlaýǵa jáne ýaqytsha qolaısyzdyqqa túsinistikpen qaraýǵa shaqyrady.
Osyǵan deıin Almatyda Otan qorǵaýshylar kúni men Jeńistiń 80 jyldyǵy qalaı ótetini týraly jazǵan edik.