Jeńis sherýi, Djeı Lo kontserti: elordalyq órt sóndirýshiler eskertý jasady

ASTANA. KAZINFORM — Astana qalasynyń Tótenshe jaǵdaılar departamenti elorda jurtyn órt qaýipsizdigin qatań saqtaýǵa shaqyrdy.

— Turǵyndardy órttiń aldyn alýǵa baǵyttalǵan saqtyq sharalaryn qatań saqtaýǵa shaqyramyz. Sebebi bıyl órt qaýpi joǵary kezeńde elordada aýqymdy respýblıkalyq jáne halyqaralyq is-sharalar josparlanǵan. Atap aıtqanda, Jeńistiń 80 jyldyǵyna arnalǵan merekelik is-sharalar, Quryltaı otyrysy jáne álemdik deńgeıdegi ártisterdiń qatysýymen ótetin kontsertter ótedi. Sondyqtan ár azamattyń qaýipsizdikke jaýapkershilikpen qaraýy — tek óziniń ǵana emes, búkil qoǵamnyń tynyshtyǵyna qosqan úlesi ekenin eskerýimiz qajet, — dedi Astana qalasy Tótenshe jaǵdaılar departamenti memlekettik órt baqylaý basqarmasynyń bastyǵy Ádil Brataev Astana qalasy kommýnıkatsııalar qyzmeti alańynda ótken baspasóz máslıhatynda.

Tótenshe jaǵdaılar departamenti eskertedi: 
— ot jaqpańyz;
— qoqysty órtemeńiz;
— aýmaqty qurǵaq ósimdikter men terek mamyǵynan ýaqtyly tazartyńyz;
— ot shyqqanyn baıqasańyz, dereý «112» nómirine habarlasyńyz.

— Atalǵan is-sharalardyń mańyzdylyǵy men olarǵa azamattar men sheteldik qonaqtardyń erekshe nazar aýdaratynyn eskere otyryp, kez kelgen tótenshe jaǵdaı, órt, qoǵamda jaǵymsyz pikir qalyptastyryp, elorda men jalpy elimizdiń ımıdjine keri áserin tıgizýi múmkin, — deıdi maman.

Birneshe kún buryn elordada jataqhanadan órt shyǵyp, 50 adamdy evakýatsııalaǵan edi. 

Sondaı-aq bıyl naýryzda Astanada 60 adam órtten qutqaryldy.