Jeńis paradyna qatysýshylardyń otbasylary áskerılerge tosynsyı jasady
ASTANA. KAZINFORM — Jaqyndarynyń dalalyq lagerge kelýi jaýyngerler úshin tosynsyı boldy, dep habarlaıdy Qorǵanys mınıstrliginiń baspasóz qyzmeti.
«Astana» óńirlik qolbasshylyǵyna qarasty 31775 áskerı bólimi áskerı qyzmetshileriniń ata-analary, baýyrlary, jubaılary men balalary elorda shetindegi dalalyq lagerge bardy.
Uly Otan soǵysyndaǵy Jeńistiń 80 jyldyǵyna arnalǵan sherýge sanaýly ǵana kún qaldy. Bul sońǵy jyldardaǵy eń aýqymdy is-sharalardyń biri. Oǵan tórt myńnan astam áskerı qyzmetshi qatysady.
Paradta eń laıyqty, kúshti ári tózimdi degen jaýyngerler ǵana saltanatty sap túzemek. Jeńis sherýi urpaqtar sabaqtastyǵynyń sımvolyna aınalyp otyr.
31775 áskerı bólimi motoatqyshtar batalony komandıriniń orynbasary maıor Dáýlet Qarakesekovtiń zaıyby kezdesýden alǵan áserin jasyra almady.
— Jubaıym úshin mundaı tarıhı oqıǵaǵa qatysýdyń mańyzdy ekenin túsinemin. Áskerı adamǵa árdaıym otbasynyń qoldaýy qajet. Biz múnda sol maqsatpen kelip otyrmyz. Joldyń qashyqtyǵy esh kedergi emes, — dedi Aıdana Qarakesekova.
Jaqyndarynyń dalalyq lagerge kelýi jaýyngerler úshin tosynsyı boldy. Dál osyndaı sátterde armııanyń tek áskerı forma men qatań tártipten turmaıtynyn sezinesiń.
Osyǵan deıin Shyǵys Qazaqstanda Jeńis kúnine oraı 100-ge jýyq shara uıymdastyrylatyny belgili boldy.