Jeńis kúnine oraı soǵys ardagerlerine qansha syıaqy berildi
ASTANA. KAZINFORM – Elimizde Jeńis kúnine oraı maıdangerlerdi qurmettep, qoldaý kórsetý dástúrge aınaldy. Jyl saıyn mereke qarsańynda azaıyp bara jatqan ardagerlerge arnaıy syıaqy bólinedi. Bıyl qaı óńir otan qorǵaýshylarǵa qandaı qurmet kórsetkeni týraly sholý jasaǵan edik.
Aqtóbe oblysynda kózi tiri jalǵyz soǵys ardagerine 2 mln teńge berildi.
Óńirde kózi tiri jalǵyz soǵys ardageri qaldy. Vasılıı Gretskııge bıyl 2 140 000 teńge berildi. Jeńis kúni soǵys ardagerimen qatar tyń eńbekkerleri men soǵys ardagerleriniń jesirlerine de áleýmettik tólem qarastyryldy.
Uly Jeńis kúnine 79 jyl tolýyna oraı Almaty oblysyndaǵy jeti ardagerge 2 mln teńgeden qarjy bólinip, azyq-túlik sebeti berildi.
Almaty oblysy ákimdiginiń málimetinshe sonymen qatar tyldaǵy eńbegi men qyzmeti úshin KSRO-nyń orden-medaldarymen marapattalǵan adamdarǵa, jaýyngerlerge, qorshaýdaǵy Lenıngrad jumyskerlerine, kontslagerlerdiń kámeletke tolmaǵan tutqyndaryna, radıatsııalyq apattar men ıadrolyq synaqtardyń qurbandary, sondaı-aq, soǵys múgedekterine 10-nan 50-ge deıingi aılyq eseptik kórsetkish mólsherinde tólemaqy tólendi.
Jeńis kúni qarsańynda aqmolalyq ardagerler 3 mln teńgeden syıaqy aldy. Aqmola oblysy ákimdiginiń málimetinshe, bıyl óńirde Jeńistiń 79 jyldyǵy qarsańynda soǵys ardagerlerine tólenetin bir rettik tólem somasy ulǵaıtylyp otyr. ıAǵnı, soǵys ardagerleri 3 mıllıon teńgeden alady. Búgingi tańda oblysta 6 soǵys ardageri turady.
Atyraýda Ekinshi dúnıejúzilik soǵys kezinde kontslager tutqynynda bolǵan keıýana turady. Jeńis kúni qarsańynda oǵan 1 mln teńge taǵaıyndaldy.
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtýynsha, Jeńis kúni qarsańynda 2 060 adamǵa birjolǵy áleýmettik kómek berý úshin 218,5 mln teńge bólingen.
Pavlodar oblysynda Jeńis kúni qarsańynda 4 myńǵa jýyq adam birjolǵy tólem aldy. Maıdangerler úshin tólem ótken jyldyń deńgeıinde qaldy.
Búginde óńirde Ekinshi dúnıejúzilik soǵystyń 7 qatysýshysy turady. Ótken jyldyń kókteminde olardyń sany 11 bolǵan.
Soltústik Qazaqstan oblysynda soǵys ardagerleri Jeńis kúnine oraı 1,5 mln teńge kóleminde aqshalaı tólem aldy.
Oblystyq ardagerler keńesiniń málimetinshe, óńirde tek tórt soǵys ardageri tiri qaldy. Onyń ishinde Valentın Volkodav 102 jasqa toldy, Vasılıı Makıenko-98 jasta, Fedor Şeglov-97 jasta jáne Dmıtrıı Sergeev – 96 jasta. Olardyń barlyǵy Petropavlda turady.
Oblys boıynsha ardagerlerge teńestirilgen sanatqa jatatyn 3,2 myń adam bar. Olardyń ishinde tyl eńbekkerleri, blokadashylar, maıdangerlerdiń jesirleri, kontslager tutqyndary taǵy basqa. Jeńistiń 79 jyldyǵyna oraı olar 18 460-tan 100 myń teńgege deıin birjolǵy tólem aldy.
Jalpy, Úkimettiń habarlaýynsha, Ekinshi dúnıejúzilik soǵys ardagerlerine 9 mamyrǵa oraı jergilikti bıýdjetterden birjolǵy áleýmettik kómek tolyq tólendi.
Búginde elimizdiń barlyq óńirinde soǵys ardagerlerine tólem jasaldy. Atalǵan maqsatqa jergilikti bıýdjetten barlyǵy 187 mln teńge bólindi.
Áleýmettik kómek kórsetýdiń qoldanystaǵy qaǵıdalaryna sáıkes 9 mamyrǵa oraı beriletin birjolǵy tólemder somasy jergilikti bıýdjetterdiń múmkindikterine jáne máslıhattardyń sheshimderine baılanysty ár oblysta derbes belgilenedi.
Eńbek jáne halyqty áleýmettik qorǵaý mınıstrliginiń usynysy boıynsha sońǵy jyldary kóptegen oblysta ardagerlerge tólemder biryńǵaı mólsherde tólenedi.
Máselen, bıyl respýblıka boıynsha birjolǵy áleýmettik kómektiń ortasha mólsheri 1,5 mln teńgeni qurady. Bul rette kóptegen óńirde ortasha mólsherden joǵary soma tólendi. Atap aıtqanda, Aqmola oblysynda – 3 mln teńge, Aqtóbe oblysynda – 2 mln teńgeden astam. Abaı, Almaty, Qaraǵandy, Pavlodar oblystary men Astana jáne Almaty qalalarynda ІІ dúnıejúzilik soǵys qatysýshylary 2 mln teńgeden aldy.
Qazir el aýmaǵynda soǵys 148 ardageri turady. Ekinshi dúnıejúzilik soǵys qatysýshylaryna áleýmettik qoldaýdan bólek, aı saıyn 16 AEK (2024 jyly 59 072 teńge) mólsherinde arnaýly memlekettik járdemaqy tólenedi.