Jeńis kúni: Áskerı qyzmetshiler Bıbigúl Tólegenovany quttyqtady
ASTANA. KAZINFORM — Almaty qalasynyń áskerı qyzmetshileri kórnekti opera ánshisi Bıbigúl Tólegenovany quttyqtady, dep habarlaıdy Qorǵanys mınıstrliginiń baspasóz qyzmeti.
Áskerı qyzmetshiler ánshige gúl shoqtary men aty ańyzǵa aınalǵan batyr Baýyrjan Momyshuly týraly kitapty syıǵa tartty.
Bostandyq aýdanynyń qorǵanys isteri jónindegi basqarmasynyń bastyǵy polkovnık Arman Turǵanbaev ánshige alǵysyn bildirdi.
— Siz tańǵajaıyp erik-jiger men ómirsheńdiktiń jarqyn mysalysyz. Sizge zor densaýlyq, uzaq ómir, shyǵarmashylyq tabys tileımiz, — dedi A. Turǵanbaev.
Bıbigúl Ahmetqyzy áskerı qyzmetshilerge alǵys aıtyp, kele jatqan mamyr merekeleri — Otan qorǵaýshy kúni jáne Jeńis kúnimen quttyqtady.
Jeńis kúnine arnalǵan kóptegen quttyqtaýlarǵa qosylǵan Bıbigúl Ahmetqyzy qazaqstandyqtarǵa ashyq aspan, amandyq jáne merekelik kóńil-kúı tiledi.
— Uly Otan soǵysyndaǵy Jeńiske qosqan baǵa jetpes úlesi úshin búgingi álemde ómir súrip jatqan ardagerler men olardyń otbasylaryna qurmet pen ystyq yqylasymdy bildemin. Qazaqstan halqy soǵys degen sózdi eshqashan bilmesin, — dep tilek tiledi ardager ánshi.
Buǵan deıin Astanada búgin Jeńistiń 80 jyldyǵyna arnalǵan áskerı parad ótetini habarlandy.
Mereıtoı aıasyndaǵy sherýdi Jibek Joly telearnasynan tikeleı efırde jáne Kazinform saıtynan tamashalaýǵa bolady.